היינט צופרי איז רבינו שליט"א אריינגעקומען צו תפילת שחרית אין קרית באבוב בשעה אכט אזייגער, ביים דאווענען האבן זיך אנגעזען הונדעטער בעלי בתים און אברכים, בנוסף צו די תלמידי ישיבות, וועלכע זענען געקומען צו פארן זיך געזעגענען צום סוף פונעם געהויבענעם נסיעה.
נאך שחרית האט רבינו שליט"א אויפגעטרויטן מיט גאר א יסודות'דיגע שמועס פאר קרוב צו אכט הונדערט בחורים תלמידים פון די באבובער ישיבות אין ארץ ישראל, קדושת ציון, עץ חיים און חכמת שלמה, און פאר די קרוב צו פיר הונדערט כולל אינגערלייט פון אלע שטעט אין אר"י.
דערנאך זענען די בחורים אדורך זיך געזעגענען ביים רב און דער רב האט זיך ווארים געזעגענט און געשמועסט מיט כמעט יעדע בחור און געטיילט מטבעות לברכה והצלחה. געזעגענען האט גענומען גאר א לאנגע צייט און דערנאך איז דער רב געגאנגען צום בית אכסניא.
נאכן ארויסקומען פון בית אכסניא האט אפגעווארט א גרויסע ציבור אנ"ש און דער האט זיך געזעגענט מיט אלע פון זיי און געפארן קיין ירושלים עיה"ק. ביים אנקומען לשערי ירושלים איז רבינו שליט"א צוגעפארן צו בית הנה"ח דוד ארי' הכהן ראטה וואו אנ"ש האבן געקענט אריינגיין מיט א קוויטל להתברך בכל טוב. אויך איז אריין אל הקודש פנימה הרב יעקב חיים מיללער די מארגן פונעם נסיעה פאר א ברכה פון רבינו שליט"א.
פון דארט איז רבינו שליט"א אנגעקומען צו די חופה במשפחת ארנוב ווי דער רב איז געווען מסדר קידושין און דערנאך געטאנצט לפני הכלה צוליב וואס די כלה איז א יתומה. דאן איז רבינו שליט"א צוגעפארן צום חתונה בבית משפחת ר' מרדכי קליין וואו הרב הצדיק ר' חיים שלום שליט"א האט מסדר געווען די כתובה און רבינו שליט"א איז געווען מסדר קידושין. ביים חופה האט רבינו שליט"א זיך באגריסט און געשמועסט מיט'ן ראש ישיבה הרב שאול אלתר שליט"א.
פון דארט איז רבינו שליט"א צוריקגעפארן צום אכסניא אין י-ם וואו נאך אינגערלייט זענען אריין אל הקודש פנימה מיט א קוויטל, און צום באשטימטען צייט איז מען געפארן צום לופטפעלד וואו עס זענען געווען פארזאמלט א ציבור אנ"ש זיך געזעגענען און רבינו שליט"א האט זיי אלע אנגעוואונשטן מיט ברכות לרוב.