לעצט מינוטיגע הכנות און פיבערהאפטיגע צוגרייטונגען צום גרויסן מעמד אבן הנחת הפינה פאר דעם נייעם בנין התלמוד תורה קומענדיגן זונטאגLooser האט געשריבן:סאטמאר מהרי"י - אנטווערפען
בהשתתפות הגה"צ אבד"ק סאטמאר ירושלים שליט"א
אנשי שלומינו תלמידי וחסידי סאַטמאַר אין אַנטווערפּן זענען איבערגעפולט מיט התרגשות לקראת דעם היסטאָרישן מעמד אדיר חגיגת הנחת אבן הפינה, וואָס וועט אי"ה געפּראַוועט ווערן קומענדיגן זונטאָג פ' תרומה לס' 'ועשו לי מקדש ושכנתי בתוכם' ווען עס וועט בשעה טובה ומוצלחת געגאָסן ווערן דער אבן הפנה פאַר'ן בנין האדיר פון דער תלמוד תורה נאָכדעם וואָס דער יעצטיגער בנין איז שוין צר מהיכל.
אַ מעמד הנחת אבן הפינה איז אייביג דורכגעזאַפּט מיט התרגשות און הייליגע געפילן, ווען אידישע קינדער גרייטן זיך צו בויען אַ פרישן בנין וואָס זאָל דינען פאַר הייליגע צוועקן, פון חינוך הדורות אָדער אַ בית המדרש, ווערט דאָס באַגלייט מיט אַ הייסע תפלה אַז 'זה הפינה בנין גדול יהיה'.
עס קומט אי"ה ספּעציעל צו פאָרן צום באַשיינען דעם דערהויבענעם מעמד דער אורח הכבוד הגאון הצדיק אבד"ק סאַטמאַר ירושלים שליט"א, בנו הגדול פון כ"ק מרן אדמו"ר עט"ר שליט"א, וואָס וועט באַשיינען דעם מעמד און אויפטרעטן לכבוד היום בשליחות הקודש, ווי אויך וועט ער באַשיינען אַ באַנקעט וואָס איז געווידמעט אויפצוטרייבן סכומים הגונים און נויטיגע פאָנדן לצורך דעם בנין בית גדול שמגדלין בו תורה ותפילה.
ווי עס איז פאָראויס געפּלאַנט און די עסקנים זענען יעצט פאַרנומען מיט די 'עירפּאָרט באַהערדע' איז צו ערלעדיגן אַז מען זאָל קענען אָפּוואַרטן דעם רב שליט"א בכבוד הראוי תיכף ביים טיר פון עראָפּלאַן דורך די ראשי ונכבדי הקהילה והמוסדות שליט"א.
דער געהויבענער גאַסט וועט אי"ה דאַווענען בהיכל בית מדרשינו און דערנאָך במשך דעם טאָג וועט מען גיין באַזוכן אַ ביקור כבוד ביי כ"ק מרן אדמו"ר מפּשעוואָרסק שליט"א און דערנאָך ביי דער מרא דאתרא שליט"א ורבני העיר אַנטווערפּן.
אַזוי אויך וועט דער רב שליט"א באַזוכן אין די כיתות פון די תלמוד תורה און זען בס"ד די פאָראויסגאַנג פון די לימודים און עס וועט זיין אַ געלעגנהייט פאַר די מלמדים וכלי קודש מיט די הנהלה רוחני שליט"א זיך צונויפרעדן און שואל עצה זיין בעניני חינוך והדרכה מיט'ן געהויבענעם גאַסט דער רב שליט"א.
זונטאָג מיטאָג צייט אום 1:30 וועט אי"ה געפּראַוועט ווערן דער גרויסער מעמד 'הנחת אבן הפינה' - וואָס איז דער הויפּט ציל פונעם ביקור כבוד פונעם רב שליט"א.
דער מעמד האדיר חגיגת הנחת אבן הפינה פאַרשפּרעכט צו זיין אַ היסטאָרישער מעמד וואָס איז שוין יאָרן נישט געזען געוואָרן אין אַנטווערפּן, ווען דער שטח הבנין וועט באַלאַגערט ווערן מיט פּאַרענטשעס פאר די ילדי התשב"ר, און אינדערמיט וועלן זיין אויסגעלייגט בענקלעך פאַר די סאַטמאַרער חסידים און דער ציבור פון אַנטווערפּן וואָס וועט קומען מיטלעבן דעם היסטאָרישן מעמד.
עס איז געוואָרן צוגעגרייט אַ הערליכע פּרעזענטאַציע וואו די קינדערלעך די ילדי התלמוד תורה וועלן זינגען הערליכע ניגונים מיט שיינע חרוזים ווי עס פּאַסט פאַר אַזאַ געהויבענעם מעמד.
דער מעמד וועט באַקרוינט ווערן מיט די השתתפות פון רבני ודייני קהלתינו הקדושה ורבני העיר אין שפּיץ פון הגאון המרא דאתרא שליט"א וחברי הבד"ץ, ועל צבאם דער געהויבענער גאַסט וואָס קומט אי"ה בשליחות כ"ק מרן אדמו"ר שליט"א באַשיינען דעם מעמד און וועט אויפטרעטן מיט אַ דרשה לכבוד המאורע.
מען וועט אי"ה האָבן די זכי' צו מקבל פנים זיין כ"ק מרן אדמו"ר מפּשעוואָרסק שליט"א וואָס וועט זיך אי"ה באַטייליגן און איבערגעבן זיינע הייליגע ברכות לכבוד דעם מעמד.
דער קלימאקס פונעם מעמד וועט זיין די דברי ברכה והתחזקות פונעם אורח הכבוד, פה מפיק מרגליות נואם בחסד עליון, הגה"צ אבדק"ק סאַטמאַר ירושלים שליט"א.
נאָכ'ן מעמד וועט פאָרקומען אי"ה אַ הערליכע מסיבת לחיים אין די עטרת אברהם זאַל פון די תלמוד תורה וואו עס וועט זיין צוגעגרייט וואַרימע איבערבייס און שתיית לחיים לכבוד דעם געהויבענעם מעמד פאר אַלע משתתפים.
זונטאָג אויפדערנאַכט כ"ט שבט ביומא דהילולא פון מרן הגה"ק בעל קדושת יום טוב זי"ע וועט פאָרקומען אַ גרויסאַרטיגער סעודת הילולא בהיכל בית מדרשינו מיט די השתתפות פון אנשי שלומינו שליט"א ובחורי הישיבה שיחי' וואו מען וועט זיך וואַשן צום יאָרצייט סעודה און דער רב שליט"א וועט דערציילן עובדות פון גרויסן זיידן דער בעל הילולא.
מאָנטאָג אינדערפרי וועט דער רב שליט"א דאַווענען תפילת שחרית בהיכל ישיבתינו הק' אינאיינעם מיט די חשוב'ע בחורים שיחי' ורמ"י הישיבה שליט"א, וואו עס וועט דערנאָך פאָרקומען אַ מעמד קביעת מזוזה צום נייעם הערליכן בנין הישיבה וואָס די הנהלה האָט לעצטנס געקויפט לרווחת התלמידים שיחי'.
שפּעטער אין טאָג וועט אָפּגעהאַלטן ווערן אַ מיטונג מיט די חברי הנהלת הקהילה והמוסדות וואו דער רב שליט"א וועט הערן אַ רעפּאָרט פון די גראַנדיעזע פּלענער להרחבת גבולי הקדושה צו בויען דעם נייעם הערליכן בנין בית המדרש לתורה ותפילה, ווי אויך וועט דער רב שליט"א הערן פון די חברי הנהלה די פּלענער פאר די נייע בנינים פון די ת"ת, ישיבה און בית רחל.
אויך וועט אי"ה מאָנטאָג פאָרקומען אַ הערליכע באַנקעט לטובת די נייע בנין התלמוד תורה פאַר אַלע אנ"ש און נגידים וואָס האָבן מנדב / מתחייב געווען העכער די 5000 יורא פאַר'ן קרן הבנין וואו דער רב שליט"א וועט אויפטרעטן מיט אַ דרשה למען כבוד בית ה'.
אנשי שלומינו אין אַנטווערפּן קוקן שוין אַרויס בכליון עינים אויפ'ן געהויבענעם באַזוך און הערליכן מעמד הנחת אבן הפינה און עס איז אַלעמענס האָפענונג און וואונטש אַז ס'זאָל טאַקע געקרוינט ווערן מיט גרויס הצלחה ויה"ר שיתקדש שם שמים על ידינו