ברעקינג אפדעיטס פון די וויליאמסבורגער גאסן

[עולם הפוך]

לעבעדיגע אפדעיט איבער ווי אזוי די שטאט וויליאמסבורג זעט יעצט אויס – ספעציעלע באריכט פאר די קאנטרי אידן

פאר די אלע אידן וואס פרעגן "וואס טוט זיך אין וויליאמסבורג יעצט?" וועל איךפרובירן צו געבן א לעבעדיגע באריכט מהנעשה והנשמע ווי אזוי די שטאטוויליאסמבורג זעט אויס זינט ענק האבן איר פארלאזט מיט 72 שעה צוריק אויפ'ן וועג צום קאנטרי.

דאנערשטאג פארנאכטס, בערך ארום 8:00 צייט, הארט נאך וואס די רויעך - פון די הונדערטער, טראקס, באסעס ספרינטערס און מיני ווענס - האט זיך געזעצט איז מעיאר ביל דעבלאזיא אראפגעקומען פאר אן עמערדזשענסי באזוך קיין וויליאמסבורג, נאכדעם וואס ער האט ערהאלטן באריכטן אז טויזנטער פאמיליעס אנשים נשים וטף, וואס ציילט זיך צו א ס"ה פון צענדליגער טויזנטער ניו יארק סיטי איינוואוינער האבן פארלאזט די סיטי און זענען געגאנגען וואוינען קיין אפסטעיט.

שפירענדיג דעם ווייטאג אז טויזנטער ניו יארקער איינוואוינער האבן פארלאזט דיסיטי במשך די לעצטע יאר צייט איז מעיאר דעבלאזיא געווען אויסן צו טון וואס ער קען צו פארזיכערן אז די פארבליבענע וויליאמסבורגער איינוואוינער בלייבן דא וואוינען און ציען זיך נישט אוועק צו אנדערע געגענטער.

פארגאנגענע דאנערשטאג ארום 12:00 זענען פילע פאליציאנטן אנגעקומען קיין וויליאמסבורג און האבן אפגעשפארט עטליכע גאסן לענגאויס ליע עוו. אנגעהויבן פון פען סט. ביז וואלאבאוט סט. דער מעיאר האט אפגעהאלטן א פרעסע קאנפערענץ וואו ער האט געמאדלן אז טיילן פון די אלטע הארץ פון ווילימסבורג, דהיינו ליע עוו.
גייען ווערן פארוואנדעלט אין א שפאציר ארט וואו משפחות וועלן קענען פארברענגען איבער'ן טאג מיט די קינדער. די מערסט היסטארישע זאך וואס דעבלאזיא האט געמאלדן איז אז די טיילן פון ליע עוו. גייען מער נישט זיין א בארג, עס גייט ווערן 'אויס בארג', דאס הייסט אז מען גייט אויסגראדן ליע עוו. פון פען סט. ביז וואלאבאוט כדי צו קענען אהערשטעלן דעם הערליכן פארק.

דאנערשטאג אינמיטן נאכט מען האט געברענגט ריזיגע שטיינער ביים ווינקל פון ליע עוו. קארנער וואלאבאוט. מען האט אראפגעשטעלט די ריזיגע שטיינער אויף די ברייט פון ליע עוו. כדי דאס זאל צוריקהאלטן די פרישע זאמד וואס גייט ווערן געגאסן צו אויסגראדן ליע עוו. פרייטאג פארטאגס איז אנגעקומען צענדליגער 'זאמד טראקס' און האבן אנגעפולט די אלע גאסן מיט זאמד, דערנך איז געווארן אריינגעברענגט צענדליגער ארבעטער צו העלפן מיט די ארבעט אז די זאמד זאל זיך גוט זעצן און מען זאל קענען אהערשטעלן די הערליכע נייע פארק מיט'ן נאמען “Old Williamsburg – New Generation” פארק.

דורכאויס פרייטאג און מוצ"ש איז די פארק געווארן אהערגעשטעלט אויף א פראכטפולע פארנעם, די צעטנער פונעם פארק פארמאגט הערליכע 'קארפעט גראס' מיט פארשידענע ערליי ביימער, די זייטן זענען ארומגענומען מיט הערליכע קאלירפולע בלומען פון
רויזן ביז היידרעינדזשעס. אויך איז דא צוויי קלענערע 'וואסער פאונטעס' וואס שפריצן וואסער די גאנצע צייט. אזוי ווי דעבלאזיא איז שטענדיג פארנומען ווי אזוי מען קען פארבעסרן די עדוקעישאן פון די קינדער דעריבער האט ער דיזיגנירט א ספעציעלע ארט ביים ווינקל פון לינטש קאנער ליע וואו קינדער נקענען אליינס פלאנצן אייגענע פלענטס און בלומען און עס גייט זיין א קאנטעסט וועמענס פלאנצונג עס וואקסט די שענסטע און העכסטע גייט באקומען פרי טיקעסט פאר אים/איר מיט די פאמיליע צו "קאני איילענד פארק" און נאך פארשידענע אמיוזמענט פארקס אין די סיטי.

אין רעזולטאט פון דאס אפשפארן ליעע עוו. פון פען ביז וואלאבאוט גייט בעדפארד עוו. פון פען ביז וואלאבאוט ווען א 2-וועי וואו קארס וועלט פון היינט אין ווייטער זיין ערלויבט צו פארן אין ביידע ריכטונגען. נאך גאר א גרויסע טויש האט פאסירט אין רעזולטאט פון די נייע פארק, אז וואלאבאוט גייט ווען א 1-וועי און מען גייט פון היינט און ווייטער קענען פארן בלויז אין איין ריכטונג, פון מארסי אראפ צו בעדפארד עוו. (וויבאלד ליע עוו. איז אפגעשלאסן). מעיאר דעבלאזיא זאגט אז מען גייט באשליסן נאך זומער צי די הערליכע פארק זאל פארבלייבן אויף איר ארט פערמענאנט.

נאך עטליכע דראסטישע טוישונגען האט פאסירט אין וויליאמסבורג אין די לעצטע 72 שעה.

די וועלט בארימטע "בערעלע קליינ'ס" רעסטוראנט איז געווארן פארוואנדעלט אין ריזיגע רעזידענשאל טורעם פון 16 שטאק. אויפ'ן ארט פונעם רעסטוראנט איז די לאבי אריינגאנג צו דעם נייעם טורעם. די ערשטע עטליכע שטאק פארמאגט הערליכע צוויי בעדרום דירות מיט א פארשט. "קליינ'ס רעסטוראנט" האט זיך ארויפגעצויגן צו די
העכערע שטאקן. פון די '10טע שטאק און ארויף פארמאגט דער בנין אפיסעס, וואס ווערן פארדינגען פאר גאר טייער געלט נעמעדיג אין באטראכט די הערליכע 'וויאו' וואס מען האט ארויסקוקענדיג פון די אפיס געביידע. אויפ'ן העכסן שטאק, נעמליך די 16'טע שטאק איז פארהאן א הערליכע גארטן מיט א דעק וואס ציט זיך ארויס ביז
העכער די בי. קיו. אי. די פלאר פון די דעק איז געמאכט פון גלאז, וואס דאס העלפט צו צו קענען זען פון דער הייעך אלעס וואס טוט זיך אין די גאנצע אומגעגענט.

אויפ'ן פלאץ פון די באקאנטע 'לינטש פארק' איז געווארן אויפגעבויעט הונדערטער שטאטישע אפארדעבל דירות, אממערסטענס זענען צוויי און דריי בעדרום דירות.
עס הערשט א זארג אז א טייל פון די דירות וועלן גיין פאר גוים. מען איז מתפלל און מען בעט צום קל חי אז נאר אידן זאלן געוונען די גורל צו באקומען די דירות.

די 'פורניטשור פון וויליאמסבורג' די בארימטע "טיב טאוו" הארדוועיר געשעפט האט זיך הערליך איבערגעבויעט מיט די נייעסטע טעכנעלאגיע, עס רעכנט אריין א 'סעלף טשעקאוט' און נאך גאר פארגעשריטענע איינריכטונגען.

איך האף זיך צו צוריקקערן מיט נאך אפדעיטס ווען די צייט וועט ערלויבן, איך האף אבער אז איך האב פארענטפערט די ברענעדיגע פראגע פון די אידן אין קאנטרי "וואס טוט זיך יעצט אין וויליאמסבורג?"..

האטס מיר אלע א לעכטיגן זומער

[דער פאני מענטש]

[פעטער משה]

מיינע שכינים האבען אריין געקלאפט פרעגען צו איך בין מסודר, נאכען הערען אזא געלעכטער…

[הײמישער זײגער]

פלצתי.. דיין כח הדמיון איז סאמעטינג ספעשל... גראדע נישט קיין שלעכטע פלאן...

[פעיק ניוז]

[הענדימען]

אזאנע פייבעלער

[מומחה יוחס]

זייער זיס....

אבער דער דיבלאזיא דארף מען ממילא לערנען טאנצן...

[צדיק בן צדיק]

דער ארטיקל וואלט זיך געדארפט אנפאנגען אזוי…(ניגון אברעמעלע פריעד)

א שיינעם חלום האב איך געזעהן, אין וויליאמסבורג בין אין געווען.

די פאליציי זוכען קרבנות,

די מעיאר האט זיך באוויזן, איידער ער פארלירט זיין בעלות…

———————-
דערוילעם זאל צוענדיגן

[זיכער יא]

פלצתי.. דיין כח הדמיון איז סאמעטינג ספעשל... גראדע נישט קיין שלעכטע פלאן...

[יצחק ברוך]

גיב איבער אז מ'איז אויפגעקומען מיט א פען וואס בלאזט אויף מאנהעטן אז אפילו וויליאמסבורג ווערט אפגעקילט, דער עולם גייט מיט דזשאקעטן אויף די גאס.

די מוסדות התורה עפענען די שווים באסיינען יעדן אויף דערנאכט וואו דער עולם גייט איין אויף א קאלטן שווים ביז חצות הלילה, מוצאי שבת ביזן עלות השחר.

[קלאנג]

דמיונות וואס וואלט מיר נישט בייגעפאלן אין וויסטן חלום, ריקסטי ארויס אזוי פון אינטערן ארבל.

שרייב אפטער, מיר באלעקן זיך

[משה צימערינג]

אויף אלעס קען איך מסכים זיין חוץ אויף די סעלף טשעקאויט אין טיב טוב.
די אלעמען באקאנטע קעשיר מר. ליכטנשטיין גיב איך נישט אויף.

[שטייגען]

נאר מיט דינמיות קען מען אנקומען
כח הדמיון בויעט עכט בנינים

[רעים]

[בענקעל]

האסט אויסגעלאזט די ברעכענדע נייעס אז צוליב מאנגל אין פראפערטי וואו צובויען נייע געביידעס האט מען אנגעהויבן צו ארויפציען א פלאטפארמע העכער די בי-קיו-אי וואס האלט זיך אויף שטאלענע ביעמס פון אונטן ארויף אויף וואס וועט האלטן אויף זיך נייע געביידעס לענגאויס די גאנצע וועג וואס לויפט דורך וומסב"ג סט. די גאנצע חלק בי-קיו-אי פון וומסב"ג פארט שוין איצט אין א טונעל. מ'קען שוין מער נישט אראפקוקן צום בי-קיו-אי פון העכער די אדורכלויפענדע גאסן.

[בן טוב]

יאפ נארוואס ארויסגעשטעלט מיינע ברייטע טריט פון קאר נאך א לאנגע וועג פון די קאנטרי, ווילי איז נישט צום דערקענען
זיסע דמיונות

[קנאפער ידען]

[קרייסלער]

ביי די מארק פלאץ לי עוו. קאר. הייוועי, פארנט פון פארקאש סילבער צענטער איז אוועקגעשטעלט עטליכע קרעדיט קארד טערמינאלן, און פון היינט און ווייטער וועלן די פעדלערס פון טעפיכער, בלומען, ערבות, רינגעלעך, אתרוגים שוין אקצעפטירן ק"ק

[קרייסלער]

ביי א ספעציעלע זיצונג פון קאמינוטי באורד זיי זענען ארויסגעקומען מיט א ביטע צו הנהלת קהילת סאטמאר צו שפילן מעלאדיעס במשך די זוממער טעג דורך זייער מעכטיגע שבת בעל סיסטעם

[שנאפס]

גוט!

וועגן די פארק, אל תפתח פה ח"ו

[נישט פשוט]

[נישט פשוט]

:lol:                      
                         
                          
                        
                    

[צולייגער]

ביסט גוט פאררוקט.... פיקוח נפש'דיג לאכעדיג

[מעכל קנעכל]

פיין גוט..
געדענק צו האלטן אפדעיטעט ווייל לויטן יעצטיגן ריטם דארף מען צו האלטן אין דריי טעג ארום ביי א פרידאם טורעם אין צענטער פון וויליאמסבורג

מאך נאר זיכער אז די העכער די הייוועי בלייבט פאר די באסעס קיין מאנסי און מאנרא, דאס איז די איינציגסטע גוטע זאך אין וויליאמסבורג.. אזוי ווי מען זאגט אין ארץ ישראל אז די איינציגסטע גוטע זאך וואס בני ברק האט איז די באס קיין ירושלים..

[אל תדאג]

-----------------------

ביסט גוט פאררוקט.... פיקוח נפש'דיג לאכעדיג

וואס איז פשט פון די אויסדריק?
כ'האב מיך די ערשטע מאל באגעגענט דערמיט לעצטע וואך אין מאמענט ארטיקל פון פנחס גלויבער