ברשות מרנן ורבנן ורבותי, נברך ששמחנו משלו ובטובו שחקנו...
קודם וויל איך מיר אמטשולדיגן פארן אזוי פלוצלינג פארשוואונדן ווערן אומגעמאלדן פון פראנויס, ס'נישט געווען מיין שולד אזוי ווייט ווי איך וועל שוין מסביר זיין.
די אייבערשטער האט געפירט אז מיין כלי מפואר מיט וואס איך האב דורך אים געקענט א לענגערע צייט הייסן חבקוק און שרייבן שטותים, איז געווארן גענצליך צובראכן פון איין מינוט אויפן צווייטן, און איך האב עס אנגענומען פאר א וואונק אז איך זאל זיך אפשטעלן דא און נישט גיין ווייטער מיטן כלי וכל המסתעף, און דאס האביך טאקע געטון, דעריבער האביך נישט געקענט מעלדן תיכף מיין אפוועזנהייט.
אבער ווי באקאנט איז היינט נישט קיין שווערע זאך צו טרעפן ערטער איבער די לענג און ברייט פונעם אמעריקאנעם קאנטינענט ווי מען קען ארויפגיין ווירטואל, וכך הוה, יעצט האביך געהאט א געלעגענהייט צו קענען זיך מקשר זיין צום דעם היזיגן ווירטואלן פלאטפארמע און שרייבן די דאזיגע שורות.
וויל איך טאקע אביסל ארויסגעבן מיינע געפילן פארן זיך גענצליך געזעגענען.
האמת יאמר, אז דער דאזיגער יאר אויף אייוועלט מיינע איז געווען פון מיינע בעסטע און ליכטיגסטע יארן אין לעבן... דער יאר גייט זיכער געדענקט ווערן ביי מיר לטובה אלץ א גאלדענע שנת היובל והשמיטה ווען איך האב געהאט די מעגליכקייט צו פארשטעלן מיין פרייליכן גוטמוטיגן קינדערישע חבקוק פערסענאליטעט טאקע אויפן דאזיגן געשמאקן מקום, און אויך געקענט מהנה זיין צענדליגע אידן מיט דעם טאג טעגליך, כמעט אן פארפאסן א טאג אויפן גוי'אישן קאלענדער און אידישן לוח...
און צווישן טויזענט אויגן גערעדט האביך עס נישט געטון ריין לשם לשמים, ווייל איך האב אויך שטארק הנאה געהאט די גאנצע צייט... אריין אין לאכן פון די אייגענע וויצן אשכול...
איך האמיר מחיה געווען צו מאכן וויצן און הערן ווי יענער לאכט דערפון, און שפעטער ליינען א וויץ פון יענעם און אים צוריקלאכן אין פנים מדה כנגד מדה... אידישע וועלט תאוות...
און נאכדערצו אז ס'האבן זיך דא געדרייט מער ווייניגער די זעלבע צוואנציג אידן בערך, וואס מען האט שוין בערך געוואוסט ווער גייט שרייבן וואס, ווער ס'גייט לאכן מיט עמאוזשיס און ווער מיט חחחח'ס... ווער ס'וועט זיך בייזערן אויף עפעס וואס איז געווען מיט אים היינט אין שול און ווער ס'וועט פרובירן צו מסביר'ן יענעמ'ס צד... ווער ס'וועט עפענען אן אשכול, און ווער ס'וועט קאמענטירן דערויף די ערשטע... ווער ס'וועט עפענען אן אנקעטע און ווער ס'וועט שרייבן 'נישטא מיין אפציע'... ווער ס'וועט שרייבן א גימטריא און ווער ס'וועט אנטדעקן א סענזאציע... ועוד ועוד...
בקיצור, ס'ממש א מחיה געווען דא...
דעריבער וועל איך מיך זיכער שטענדיג בענקן צו די גליקליכע לעבנסלוסטיגע מאמענטן דא, וואס כולם שוים לטובה איז עס געווען נאר סמיילי'דיג און לוסטיג בלי כחל ושארק ביסן... אן קיין שום פארהאנקעריי צו טשעפעריי אדער סיי וועלכע אומבאקוועמע אינצידענט מיט סיי וועם, אויסער די קאמבאדיע רעגירונג וואס אפילו יענס האט זיך גענדיגט גוט ב''ה...
אבער ה' נתן וה' לקח, יעדע זאך האט זיך זיין צייט, עת לשחוק ועת לשתוק, יעצט איז די צייט צו אריבערמישן א בלאט אינעם לעבן און זיך שיידן פון דעם באליבטן לעכטיגע מקום, און גיין טון אנדערע זאכן אנשטאט דעם, איך ווייס נישט צו בעסערע זאכן, אבער אנדערע זאכן...
איז וויל איך מעלדן אפיציעל אז איך גיי פון דא, און איך נעם מיט מיט מיך נאר גוטע געשמאקע פרייליכע זכרונות וואס וועלן מיר בלייבן איינגעקריצט לנצח צום גוטן.
און נאכדערצו אז איך האמיר דא באקענט מיט צענדליגע וואוילע הייליגע אידן וואס איך וואלט בדרך הטבע זיך קיינמאל נישט באקענט דורכאויס מיין לעבן, א זאך וואס איז מיר שוין צוניץ געקומען אסאך און וועט זיכער מיך ווייטער צוניץ קומען, וואס פארדעם אליין האט זיך מיר שוין געלוינט מיין יאר דא אויפן וועלטל!!
איך האף איך האב קיינמאל קיינעם נישט מצער געווען, אז יא קען מען קומען אין אישי און מיר וועלן זיך איבערבעטן, און בכלל קען מען מיך שיקן אישי איבער סיי וואס, און ווען איך וועל אריינקומען צומאל אזויווי יעצט, וועל איך עס זען און פרובירן ענטפערן.
און זעטס צו אנהאלטן די פרישקייט דא און די גוטמוטיגקייט און די רעספעקט איינער צום צווייטן, קארגטס נישט קיין סמיילי'ס און עמאוזשיס און חחחחח ויהיה לכם לטוב בזה ובבא....
החותם בדמע ובשמחה ובבענקעניש
חבקוק בן מתיא בן חרש בן חבקוק מטריפאלי
מלפנים פורים רב דפארברענגען
כעת פורים רב עמי בבית
