צו אלע די וואס רעדן זיך אפ איבער גע'גנב'עטע האלבע און גאנצע שטיקלעך פון ניגונים אויף דעם אלבום, הערט'זשע מיר ביטע אויס א מינוט.
קודם כל, איך פארשטיי דעם פילינג זייער גוט, פון מ'האט אים "געפאקט ביי די מעשה". און גם אני הקטן, ווען איך כאפ אזא זאך ווי איין ניגון ענדלט אינעם צווייטן, לויף איך אויך אריין אויף אלע פיר אינעם
אשכול דעזיגנירט פאר אזעלכע אנגעלעגנהייטן.
אבער ביטע פארשטייטס איין זאך.
עטץ קענטס נאך נישט די ניגונים פון דעם אלבום. פינטל.
און -- עטץ קענטס יא די אלטע ניגונים אין וואס די נייע ניגונים ענדלען.
די סידי איז ערשינען אינגאנצן קנאפע צוויי טאג צוריק, און ס'איז נישט מעגליך זיך צו אויסלערנען און קומען צום טעם פון די ניגונים - און נאכדערצו אזויפיל ניגונים, א פולי לאָודעד סידי מיט 12 ניגונים - אין אזא קורצע צייט.
אדרבה, א ניגון וואס דו האסט זייער שטארק ליב שוין אין די ערשטע מינוט, איז לופט. וועסטו שוין דעם ניגון נישט קענען הערן אין פיר וואכן ארום. אין דעם האב איך זיך שוין איבערצייגט איינמאל און נאכאמאל. און כ'מיין יעדער קען עדות זאגן דערויף.
א גוטע ניגון נעמט צייט ביז מען קומט צום טעם דערפון. ביז מען באקומט דעם געפיל פונעם ניגון.
סאו גלייך ביים הערן דעם אלבום די ערשטע מאל, ווערט מען גלייך משוגע פאר די רייכע מוזיק, (הגם עכט רייכע מוזיק פארשטייט מען אויך טיפער און טיפער ווי מער מ'הערט עס, עכ"ז קען מען שוין גלייך זען פון וואס מ'האנדעלט.) אזוי אויך פריידט מען זיך מיט די געשמאקע מיקס - ווער עס פארשטייט, אדער האלט עכ"פ אזוי - אבער מיט די ניגונים קאננעקט מען נאכנישט עכט, סאו די ערשטע זאך לויפט מען כאפן וועלכע תנועה איז יא אדער נישט גע'גנב'עט.
(אגב, פארוואס טוט מען פונקט אזוי? ווייל די מוח פון א מענטש כאפט שווער - כפי ערך - נייע זאכן. איז פון זיך אליין וועט מען אלץ פרובירן צו קאמפּערן די נייע זאך צו עפעס וואס איך קען שוין פון פריער. צום ביישפיל ווען דו זעסט א נייע פנים וועסטו אלץ קודם פרובירן צוצוגלייכן אים צו איינעם וואס דו קענסט שוין.)
איז ברידערלעך טייערע, געבטס עס א דריי פיר וואכן, ביז עטץ וועטס קומען צום טעם פון די ניגונים, יעדער מיט זיינע עטליכע וואס וועלן אים כאפן, און דאן וועט עטץ נישט ענדיגן זיך באלעקן די פינגער!
דעמאלטס וועט מען מער נישט וויסן פון קיין צרות און גניבות צו זאגן...
ודו"ק כי נכון הוא...
ש'כח פארן אויסהערן, און אויב ביסטו נישט איינשטימיג מיט מיר בין איך נישט ברוגז בכלל.