פארט לארידעל תשפ"ג
(חלק א)
ברוך השם האמיר זוכה געווען נאכאמאל זיך אביסעל צו ווארעמען פון די קאנאדישע קעלט, גראדע איז נאכנישט אנגעקומען די שטארקע קעלט יעצט, כהאף אז סזאל טאקע נישט אנקומען.
ארויסגעפארן זעמיר פונעם טראדאו עירפארט יום א' פרשת וארא מיטן 1:20 פליגער יעדע זיץ איז געווען באזעצט, און געלאנדעט אינעם פארט לארידעל – האליוואד עירפארט אזוי נאכמיטאג שקיעה צייט (די וועג נעמט מיט א שעה לענגער ווי פון ניו יארק), גלייך ווען כבין אריינגעקומען אינעם טערמינעל האט זיך דערקענט א געוויסע שינוי פון פאריגע מאל וואס מאיז דארט געווען, זיי האבן אינגאנצן איבערגעמאכט די טערמינאל און עס הערליך שיין אוועקגעשטעלט, אבער איין זאך איז יא געבליבן כדי אריינצוקומען אינעם טערמינאל באקומסטו אזא כמו ברוך הבא פון די מענטשן וואס ווארטן ארויפצוגיין אויפן פליגער, געווענליך קומט מען אן צו א האלוועי וואס נעמט דיך ביז די פעקלעך אפטיילונג, דא קומסטו אריין צו די געיטס.
אזויווי מגייט דורך די אמעריקאנע גרעניץ נאך אין טראדאו עירפארט זענען מיר גלייך געלאפן כאפן די רענצלעך וואס האט טאקע געכאפט די אויבן אן און איז ארויסגעשפיגן געווארן די ערשטע, ברוך השם מהאט שוין אלע פעקלעך און רענצלעך, יעצט איז די צייט צו זיכן א וועג צום האטעל, די טעלעפאנען און אנדערע כלים האבן נאכנישט זיך געכאפט קוקט אויס אז מדארף טוישן סערוויס זיי זענען טיפיקל פראנצויזישע. ענדליך האט מען געטראפן א וועג דורכן נעמען א עירפארט טעקסי וואס האט אונז גענומען צום מעריאט האטעל (מער איבער די האטעל קוקט
דא), א וועג פון פופצן צוואנציג מינוט, און האט געקאסט א צוואנציגער.
ארויסקומענדיג פונעם טערמינאל האט מיר באגעגנט א גאנץ א געשמאקע וועטער, אזא וועטער וואס מפילט בשעתן ארויסקומען פון סווימינג פול..... כאפסט וואס כמיין?
לויט ווי כהאב פארשטאנען האב איך בשעתן קוקן די וועטער פאר יענע טעג געזען אז א וואך פארדעם דאנערשטאג דארף צו רעגענען, און לויט די לאגיק מיינט עס אז סקילט אביסעל אפ די וועטער וכך הוה....
אנקומענדיג אינעם האטעל בשעתן אריינטשעקן איז צוגעקומען איינע פון די ארבעטערס און זיך אנגערופן וועלקאם בעק... לויט ווי ער זאגט געדענקט ער אונז פון פאריגע מאל, יענער איז געווארן אונזער באשטימטע גיי אויב אונז דארפן עפעס הילף.
פארגעסן צו שרייבן פארן בוקן די האטעל האב איך געטשעקט די פרייזן און סאיז מיר געווארן נישט שווארץ אבער אזא כמו שווארץ, די נאמבערס פאר א פלענע רום צום וואסער איז געווען דאפעלט פון וויפיל סאיז געווען פאריגע מאל, האב איך אנגעהויבן צו קוקן אנדערע האטעלן אין די געגנט א גוטע פלאץ קלין שיין אבער פאר ביליגער, מיין אויגן איז געפאלן אויף די הילטאן האטעל וואס איז נעבן די קאנרעד האטעל און יענע אנדערע גאנצע רייע פון האטעלן (ווי געשריבן פאריגע מאל), זיי האבן עס איבערגעמאכט פאריאר גאר שיין און סאיז אויסגעקומען מיט כמעט טויזענט דאלער ביליגער, אבער איין זאך א די פענסטער איז נישט גלייך קעגן וואסער נאר אינדערזייט, אבער מבאקומט גאר אסאך אין די רום, למעשה האב איך איבערגעשטעקט די פרייזן אין מעיראט ווייל כהאב גאר שטארק געוואלט דארט גיין צוליב די פילע מעלות וואס כהאב שוין געשריבן אויבן, זעה איך דארט אז די רום קעגן די סיטי איז די זעלבע ווי די הילטאן רום, יעצט האט זיך אנגעהויבן א שטארקע חקירה צו זאל מען גיין אין די הילטאן ווי מבאקומט א ריזיגע רום פלאס נאך א לווינג רום אין א זייטיגע פענסטער צום וואסער אבער האט נישט קיין געהעריגע ביעטש און מדארף אריבערקראסן דערצו, אדער גיין פאר די זעלבע געלט צום מעריאט וואס באקומסט א קלענערע רום נישט קיין ביעטש וויא אבער באקומסט א ריזיגע ביעטש ווי די קענסט גיין און הערליכע גראונדס??? די חקירה האט זיך געצויגן ביז די ישועה איז געקומען פון א אנדערע פלאץ, נאך אזא טאג צוויי האב איך געגעבן אזא טשעק נאכאמאל אויף די מעיראט וועבסייט און סאיז מיר ווייס געווארן פאר די אויגן, די פרייז פאר א רום קעגן וואסער איז די זעלבע געווארן ווי די הילטאן רום, גלייך האט מען עס געבוקט און געבוקט טיקעטס קיין פארט לארידעל און דריי טעג שפעטער שטייען מיר דא ביים דעסק און מטשעקט אריין.
סהאט נאך גענומען אביסעל ביז מהאט באקומען די שליסל צום רום ווייל די באנק האט געמאכט פראבלעמען און פארדעכטיגט די אקטיוויטעטן פלאס כהאב פארגעסן צו אינקריסן מיין דעילי לימיט און ביז זיי האבן וועריפייט מיט קאודס צו מיינע טעלעפאונס וואס האבן נישט געהעריג געארבעט האט גענומען אזא דריי פערטל שעה, אבער מאיז געווען רואיג ברוך השם ווייל סאיז וואקאציע טיים.
נאך א קליינע קרישקעלע וואס מיר האבן געהאט איז געווען ווען מיר זענען ענדליך אנגעקומען צום רום און מיר זעהן דארט א צווייטע משפחה שטייט דארט און טרייט צו עפענען די טיר, צו אונזער ווינדער זאגן זיי אז זיי האבן באקומען די זעלבע רום אבער זייער שליסל גייט נישט האבן מיר געטרייט אונזער שליסל און יא מיר האבן עס...
די ערשטע זאך נאכן אויסטשעקן די רום און נאך אריינגעכאפט צו זעהן די וואסער האט זיך די הינגער געשטארקט און מהאט שנעל ארויסגענומען די אלטע ליסטע פון פלעצער ווי מקען באשטעלן עסן, די גורל איז געפאלן אויף יאם בערי זייערע פרייזן זענען זייער גוט און מאכן גאנץ פיינע עסן, מיר האבן זיי גענוצט פאר די טעגליכע פרישטאגס ווייל זיי האבן דעליווערט ביז פארט לארידעל, די אנדערע האבן נישט געהאט די אפציע.
נאכן זיך באזעטיגן האבן מיר זיך ארויסגעלאזט אויסטשעקן די פלאץ אינמיטן האבן מיר געטראפן דארט צוויי אינגעלייט וואס האבן זיך דארט באקוועם געמאכט פאר די וואך אן די ווייבער, קוקט אויס ווי זיי האבן געליינט מיין ארטיקל ...
נאך א שטיק צייט האט מען זיך געלייגט שלאפן נישט פאר מהאט זעכער געמאכט אז די קינדער זענען מסודר, די נאכט איז צוגעפאלן גאר שנעל כ'רעדט מיר איין אז די זון גייט גאר שנעל אינטער שנעלער ווי אין ניו יארק, איז עס טאקע אזוי?