די צייטונג – נייעס בולעטין - סופּרים קארט פּסל'ט קאומא'ס שטרענגע צוימונגען אויף שולן
ויהי בחצי הלילה:
סופּרים קארט פּסל'ט קאומא'ס שטרענגע צוימונגען אויף שולן אדאנק נייע קאנסערוואטיווע ריכטער בערעט
דער סופּרים קארט האט מיטוואך ביינאכט, נאענט צו 12:00 אזייגער - וואס דאס אליין אז דער אורטייל איז אזוי שפּעט ארויסגעגעבן געווארן ווייזט אויך אויף די ערנסטקייט מיט וואס דער סופּרים קאורט האט באהאנדלט די זאך - געאורטיילט אז די שטרענגע צוימונגען וואס גאווערנאר קאומא האט ארויפגעלייגט אויף שולן און להבדיל קירכעס אז זיי טארן נישט האבן מער ווי צען מענטשן אויב זיי געפינען זיך אין א "רויטע זאון" איז אומקאנסטיטוציאנאל און עס איז פארבאטן געווארן.
די אפּשטימונג איז געווען פינף צו פיר ווען דער הויפּט ריכטער דזשאן ראבערטס האט זיך געשטעלט מיט די דריי ליבעראלע ריכטער קעגן דעם מאיאריטעט אורטייל, אבער די פינף קאנסערוואטיווע ריכטער, האבן געשטימט קעגן קאומא און לטובת רעליגיעזע פרייהייט. ס'איז געווען דער ערשטער אורטייל אין וואס עס האט זיך באטייליגט די קאנסערוואטיווע נייע סופּרים קארט ריכטער עימי קאני בערעט, און זי האט טאקע איצט אפּגעגעבן די אנטשיידענע שטימע לטובת רעליגיע.
מיט דעם איז נאכנישט די געשיכטע פארטיג, ווייל פאקטיש האט דאס געריכט בלויז נאכגעגעבן דעם פארלאנג פאר א צייטווייליגן אפּשטעל פון די קאומא ווירטשאפט ביז עס וועט פארקומען א פולער פארהער אינעם פעדעראלן אפּעלאט געריכט אין ניו יארק, וואס איז באשטימט געווארן אויף דעצעמבער 18, פרייטאג פּ' מקץ, דער לעצטער טאג ("זאת") חנוכה און דערנאך וועט עס ווארשיינליך נאכאמאל צוריקקומען צום סופּרים קארט. פארשטייט זיך עס איז מעגליך אז גאווערנאר קאומא, זעענדיג אז די גייסט פונעם העכסטן געריכט איז איצט גענויגט לטובת רעליגיע, וועט טוישן זיין צוגאנג און אויפהערן פארפירן קעגן "ארטאדאקסישע אידן" וואס זיינע אייסערונגען ווען ער האט אזוי גערעדט, פּונקט ווי מען האט געהערט א האלב יאר צוריק ענליכע רייד פון מעיאר דיבלאזיא, האט זייער שטארק געשאדט פאר די סטעיט אדוואקאטן דורכאויס די לעגאלע פּראצעדורן ווייל מען זעט אז ער צילט קעגן רעליגיע.
ווארשיינליך וועט קאומא, וועלכער איז א כיטרער פּאליטישאן און האט נישט ליב צו פארלירן (ווער האט דען יא ליב צו פארלירן?...), איצט טוישן זיין צוגאנג און וועט קומען צו א פארשטענדיגונג אין די קומענדיגע פּאר וואכן נאך פאר'ן אפּעלאט געריכט דאטום, אבער עס קען אויך זיין אז די אומשטענדן וועלן נישט לאזן פאר קאומא צו גיין אין אזא ריכטונג, ווייל מען הערט דאך שוין איבער א וואך צייט ווארענונגען סיי פון קאומא און אויך פון דיבלאזיא אז דער מצב הויבט אן ווערן ערנסטער אין ניו יארק, און עס איז מעגליך אז אנהויב דעצעמבער זאל די גאנצע שטאט ניו יארק באקומען אן "אראנדזש זאון" קלאסיפיקאציע, ווייל די צאל קאוויד פאלן האבן שוין אנגעהויבן צו שטייגן אויך אין די שטאט, וואס אונטער די איצטיגע קאומא עקזעקוטיווע פארארדענונג, טארן נישט זיין מער ווי 25 מענטשן אין א שול אדער להבדיל קירכע אין אן "אראנדזש" געגענט. אין א "רויט" געגנט איז די מאקסימום בלויז 10.
מען זעט אז די ריכטער האבן זיך שטארק געפּלאגט מיט דעם אורטייל ווייל דער הויפּט באפעל איז נישט אונטערגעשריבן געווארן דורך די ריכטער. עס פארנעמט זיבן זייטן און באהאנדלט די לעגאלע טענות פון ביידע זייטן אנווייזנדיג אז מען טאר נישט דיסקרימינירן קעגן רעליגיע. דערנאך קומען באזונדערע אויפקלערונגען, אורטיילן וואס די ריכטער האבן געשריבן, וואס אויך דאס איז א זעלטענהייט, 5 באזונדערע אויפקלערונגען אויף א "טי אר. או." פארלאנג.
איינס איז פון ריכטער ניעל גארסוטש, דער ערשטער ריכטער וועמען פּרעזידענט טראמפּ האט באשטימט, דערנאך איז דא א באזונדערער אורטייל פון ריכטער ברעט קעווענאו, דער צווייטער טראמפּ באשטימטער ריכטער, וואס די זענען געגאנגען מיט די מאיאריטעט.
דער הויפּט מינאריטעט אורטייל איז געשריבן געווארן דורך הויפּט ריכטער דזשאן ראבערטס. דאס איז געווענליך די איינפירונג אין סופּרים קארט, אז דער הויפּט ריכטער שרייבט דעם אורטייל פאר די מאיאריטעט אדער מינאריטעט, לויט ווי דער ריכטער געפינט זיך ביי דעם אורטייל, און אויב ער וויל נישט, קען ער אפּטרעטן און באשטימען אן אנדערן ריכטער וואס זאל שרייבן דעם הויפּט אורטייל פון זיין זייט. אויף די אנדערע זייט, גייט דער "כבוד" פאר דעם ריכטער מיט'ן העכסטן סיניאריטעט, און אויך דארט קען יענער אפּטרעטן, איבערגעבן עס פאר א צווייטן ריכטער. ממילא האט ראבערטס געשריבן איצט דעם הויפּט מינאריטעט אורטייל וואס פארנעמט צוויי און א האלב זייטן.
דערנאך איז דא א באזונדערער מינאריטעט אורטייל פון די דריי ליבעראלע ריכטער וואס איז געשריבן געווארן דורך ריכטער סטיווען ברייער אין וואס עס האבן זיך אנגעשלאסן די ריכטער סאניא סאטאמאיער און עלענא קאגאן. (ברייער, א איד, איז באשטימט געווארן דורך פּרעזידענט קלינטאן. סאטאמאיער, א שפּאנישע פון בראנקס, איז באשטימט געווארן דורך פּרעזידענט אבאמא, וועלכער האט אויך באשטימט קאגאן, א איד. די אידן האבן געשטימט קעגן די אידן, אבער די קאטוילישע ריכטער האבן געשטימט פאר די קאטאליקן, וואס די קאטוילישע קירכע פון ברוקלין איז "צו מזל" - עס איז אלץ בעסער אז אידן זאלן נישט "באשולדיגט" ווערן אלס "טומלער" אויב מען קען דאס פארמיידן - באטראכט געווארן אלס הויפט אפעלאנט.) דער ברייער אורטייל פארנעמט עטוואס מער פון פינף זייטן.
דערנאך האבן די ריכטער סאטאמאיער און קאגאן געשריבן באזונדערע פיר און א האלב זייטן אין וואס זיי געבן מער רעכט פאר די רעגירונג צו פאסן באשלוסן ביי א פּאנדעמיק אפילו ווען עס קומט עטוואס אין קאנפליקט מיט רעליגיע.
ווי מיר האבן שוין ביי פריערדיגע געלעגנהייטן אויפגעקלערט, איז אריינגעגעבן געווארן צוויי אנקלאגעס אין פעדעראלן געריכט אין ברוקלין פארלאנגענדיג אן עמוירדזשענסי ערלייכטערונג נאכדעם ווי גאווערנאר קאומא האט דעם ערשטן טאג חוה"מ סוכות געמאלדן זיין נייעם סיסטעם פון רויט, אראנדזש און געל געגנטער לויט די ערנסטקייט פונעם אונטערגאנג אין די געגענטער, וואס ער האט באצייכנט אלס "מייקרא קלאסטערס", און עטליכע אידישע געגענטער זענען אריין אין די "רויט" קאטעגאריע.
אין די רויטע געגענטער איז מען זייער שטרענג, מען שליסט שולעס און געשעפטן, א.ד.ג. שולן און להבדיל קירכעס קען מען נישט אינגאנצן שליסן ווייל א פעדעראלער ריכטער אין אלבאני האט שוין אין יוני געאורטיילט אז דאס איז א פארלעצונג פון די קאנסטיטוציע'ס פרייהייט פון רעליגיע גאראנטיע. מען האט אין יענע אנקלאגע אנגעוויזן אז עס איז ממש א דיסקרימינאציע ווען מען האט געלאזט אנגיין די "בלעק לייווס מעטער" דעמאנסטראציעס וואס קיינער האט עס נישט געטשעפּעט כאטש מאסן זענען געווען צוזאמגעשטופּט ביי די ראליס און מארשן און מען האט זיי נישט געטשעפּעט אפילו ווען זיי האבן נישט געהאט קיין מאסקעס. דער אויסרייד איז געווען, אז זיי מעגן דעמאנסטרירן אונטער דעם ערשטן אמענדמענט וואס גאראנטירט פרייהייט פון רעדע. אויב אזוי, גאראנטירט דאך דער זעלבער אמענדמענט אויך פרייהייט פון רעליגיע, פארוואס שליסט מען קירכעס און להבדיל שולן? אויף דעם האט טאקע דער ריכטער באפוילן אז מען טאר דאס נישט שליסן.
אזוי האט זיך גאווערנאר קאומא אן עצה געגעבן. וויסנדיג אז ביי אידן מוז זיין "מנין", האט ער געשטעלט א מאקסימום פון צען מענטשן וואס וועלן ערלויבט זיין אין א שול און דאס זעלבע להבדיל אויך אין א קירכע אדער מעטשעט, ווי לאנג זיי געפינען זיך אין א רויטע געגנט.
ווען קאומא האט עס געמאלדן איז אריינגעגעבן געווארן צוויי קלאגעס אין פעדעראלן געריכט אין ברוקלין, די ערשטע וואס האט פארטרעטן אידישע שולן און אינטערעסן, וואו דער באגאבטער אדוואקאט אבי שיק האט צוגעשטעלט א מייסטערהאפטע ארבעט. ער האט דערציילט פאר "די צייטונג", אז כאטש מען האט נאך צוערשט פרובירט מיט שתדלנות ביים גאווערנאר, האט ער זיך אבער שוין יענעם נאכמיטאג, דינסטאג חוה"מ, גענומען צו די שווערע ארבעט צוצוגרייטן א געריכטליכע אנקלאגע, אז מען זאל כאטש נישט שטערן דעם יו"ט. די קואמא פרעסע קאנפערענץ איז געווען 3 אזייגער. 2 שעה שפעטער, אנשטאט אהיימצוגיין 5 אזייגער צו די משפחה, עס איז דאך חוה"מ, האט שוין שיק געארבעט דאס צו באקעמפן.
די צווייטע קלאגע איז געקומען פון די קאטוילישע קירכע אין ברוקלין, וואס צווישן זייערע טענות האט זיך זייער שטארק ארויסגעזען אז זיי זאגן אז ביי זיי איז נישטא קיין אונטערגאנג, זיי האלטן אין ארדענונג די קירכעס, זיי פאלגן אויס די רעגולאציעס פון אפּזונדערן, מען גייט מיט מאסקעס, מען רייניגט אלעס אפּ נאך יעדן צוזאמקונפט, א.א.וו. זייער פארלאנג איז געגאנגען צו אן אנדערן פעדעראלן ריכטער אין ברוקלין.
דורכליינענדיג זייערע טענות האט מען געקענט ארויסנעמען צווישן די שורות אז זיי האבן זיך געשפּירט מער באקריוודעט אז זיי מוזן ליידן ווייל די אידן דאווענען יא אין די שולן אין א גרעסערע צאל און ווי מען זעט פון די בילדער אויף די גאסן, גייען זיי נישט אין קיין מאסקעס, כאטש זיי האבן דאס נישט אפען ארויסגעשריבן.
אין די אידישע אנקלאגע איז אויך ארויסגעברענגט געווארן געוויסע פּונקטן פארוואס מען פארלאנגט אן עמוירדזשענסי אפּשטעל פון די קאומא צוימונגען, און עס איז נישטא צייט צו ווארטן ביז נאך א לענגערן פארהער און די נאכפאלגנדע אפּעלאטן, ווייל דער שאדן וואס ווערט איצט אפּגעטוען איז אן אומערזעצבארער שאדן. אזוי ווי עס איז געווען הושענא רבה ווען דער ריכטער האט באהאנדלט דעם אידישן פארלאנג, איז גאר איינדרוקספול געווען וואס שיק האט אויך דערמאנט אלס ביישפיל וואס אלע אידן דארפן עולה זיין שמחת תורה, און דאס איז אויך אן אומערזעצבארער שאדן אויב מען לאזט נישט גיין אין שוהל, ווייל נאך שמחת תורה, איז דאך דאס שוין פארבייגעגאנגען.
דער אידישער פארלאנג איז צוריקגעוויזן געווארן מיט'ן אויסרייד אז מען באהאנדלט נישט די אידן און אידישע מוסדות ערגער ווי אנדערע, אבער דער קאטוילישער פארלאנג האט יא געטראפן א סימפּאטישן אויער ביים ריכטער ניקאלאס געראופיס, וועלכער האט זיך שטארק געפּלאגט און אפילו ווען ער האט אפּגעווארפן זייער פארלאנג האט ער אנערקענט אז זיי האבן גערעכטע טענות, אבער אין צייטן פון א פּאנדעמיק, האלט ער נישט אז עס איז אין פּלאץ פאר אים אלס א ריכטער צו גיין קעגן קעגן דעם גאווערנאר, וואס דער גאווערנאר בויט זיינע באשלוסן אויף די ראט פון דאקטוירים און וויסנשאפטלער.
ביידע האבן אפּעלירט צום פעדעראלן אפּעלאט געריכט, און אויך דארט איז אפּגעווארפן געווארן דער פארלאנג פאר אן עמוירדזשענסי אפּהאלט פון קאומא'ס פארארדענונגען, כאטש איינע פון די דריי אפּעלאט ריכטער האט זייער קלאר געגעבן רעכט פאר די רעליגיעזע טענות.
איצט איז עס אנגעקומען צום העכסטן געריכט און די מאיאריטעט ריכטער האבן ארויסגעברענגט אז ביידע, סיי די קאטאליקן און אויך די אידן, טענה'ן אז מען באהאנדלט שטרענגער געבעט הייזער ווי ענליכע סעקולארע פּלעצער און זיי האבן אויך געזאגט - וואס דאס איז נישט אפּגעפרעגט געווארן דורך די סטעיט אדוואקאטן - אז זיי האבן אויסגעפאלגט אלע פּובליק העלט אנווייזונגען, זיי האבן אנגענומען מער באווארענונג מיטלען און זיי האבן געלאזט מאקסימום 25 פּראצענט אדער 33 פּראצענט באטייליגונג שוין חדשים און עס איז נישט געווען קיין איין איינצלנער פאל וואס איז געקומען פון באטייליגן זיך ביי די געבעטן.
די ריכטער האלטן, אז זיי האבן אויפגעוויזן אז זייערע ערשטע אמענדמענט טענות וועלן ווארשיינליך געווינען, און אז אויב מען גיט זיי נישט איצט די ערלייכטערונג וואס זיי פארלאנגען וועט עס פירן צו וואונדן וואס קענען נישט פארראכטן ווערן, און אז מען גיט זיי יא נאך וועט עס נישט שעדיגן די אינטערעסן פון פאלק. די פריערדיגע דריי פּונקטן זענען זייער וויכטיג געווען ארויסצוברענגען, ווייל דאס פעלט אויס צו בארעכטיגן אן עמוירדזשענסי הילף פארלאנג פונעם העכסטן געריכט.
לויט ווי שיק האט געזאגט פאר "די צייטונג", האלט ער דאס פאר'ן וויכטיגסטן פונקט וואס האט געברענגט דעם געוואונטשענעם אורטייל, אז די ריכטער האבן באטאנט אז די אנקלאגע וועט ווארשיינליך געווינען! (דאס איז אויך א קלארער מעסעדזש פאר די אפעלאט ריכטער וואס וועלן אפהאלטן דעם לענגערן פארהער חנוכה, ווייל עס שמעקט נישט פאר קיין שום ריכטער צו געבן אן אורטייל וואס וועט גאנץ זיכער אפגעווארפן ווערן דורכ'ן סופרים קארט.)
נאך א פונקט וואס שיק האט באטאנט איז געווען, אז ער האט באקעמפט ביים סופרים קארט די טענות פון די סטעיט אז די קלאגע איז שוין moot, וואס מיינט, עס איז שוין נישט אקטועל, ווייל קואמא האט שוין באפרייט די אלע געגענטער צו די מילדסטע "געל" קאטעגאריע, א פונקט וואס איז נישט באקעפט געווארן דורך די קירכע פארטרעטער, און די מאיאריטעט ריכטער האבן זיך שארף אדרעסירט ביים אפווארפן די דאזיגע סטעיט טענה.
דער אפּעלאט צום העכסטן געריכט איז געגאנגען צו ריכטער ברייער און ער האט דאס באלד איבערגעגעבן פאר אלע סופּרים קארט ריכטער און אויף דעם איז געקומען דער איצטיגער עמוירדזשענסי אורטייל וואו די פינף מאיאריטעט ריכטער האבן באהאנדלט פארוואס עס זעט ווי זיי האבן אויסזיכטן צו געווינען ווען עס וועט פארקומען א גרעסערער פארהער אדער פּראצעס.
איין הויפט טענה פון די אדוואקאטן וואס פארטרעטן די סטעיט - די סטעיט אטוירני דזשענעראל לעטישא דזשעימס איז באאויפטראגט צו פארטיידיקן די סטעיט - איז געווען אז עס איז שוין בכלל נישט אקטועל די נויט פאר אן עמוירדזשענסי אורטייל ווייל ברוקלין איז שוין ארויסגעגאנגען פון רויטע און אראנדזש זאונס און טייל פון ברוקלין איז איצט בלויז אין א געלן זאון. ממילא איז שוין נישט אקטועל די פריערדערמאנטע צוימונגען אויף באטייליגונג ביי די געבעטן.
הויפּט ריכטער ראבערטס האט דאס גענוצט אלס אן אויסרייד פארוואס ער אורטיילט קעגן דעם אפּעלאט, זאגנדיג אז עס איז שוין נישט אקטועל. ער האט אין זיין אורטייל יא קריטיקירט וואס די סטעיט לייגט א 10 אדער 25 מענטשן מאקסימום באטייליגונג ווען מען איז אין א רויטע אדער אראנדזש זאון, וואס דאס ווייזט אז ראבערטס איז אויך גענויגט דאס צו פּסל'ן אלס אומקאנסטיטוציאנאל. די טענה האט ער יא פארשטאנען, אנערקענט, אז אויב מען לאזט אין אנדערע פּלעצער גיין אן קיין מאקסימום איז ווי א דיסקרימינאציע קעגן רעליגיע אויב דא שטעלט מען יא אזעלכע קליינע מאקסימומס.
די מאיאריטעט ריכטער האבן אבער אוועקגעמאכט די ענדערונג וואס קאומא האט דורכגעפירט ממש אין די לעצטע טעג פאר דער אפּעלאט איז געקומען צום סופּרים קארט. דאס איז ברייטער ארויסגעברענגט געווארן דורך ריכטער גארסוטש, אז פּונקט ווען דאס געריכט האט זיך צוגעגרייט צו באהאנדלען די אפּליקאציעס (אפּעלאטן) האט דער גאווערנאר לויזער געמאכט זיינע צוימונגען אבער די גאנצע צייט האט ער (קואמא) ווייטער באטאנט אז ער האט די מאכט נאכאמאל זיי איינצוציען ווען אימער, לויט ווי די אומשטענדן בארעכטיגן עס. גארסוטש שרייבט, ממילא אויב מיר ווארפן ארויס דעם אפּעלאט איז נישטא גארנישט וואס זאל פארמיידן דעם גאווערנאר באלד אויפצומארגנס נאכאמאל ארויפלייגן די צוימונגען, און אין די צייט וואס עס דויערט ביז א נייע קלאגע וועט זיך ארויפארבעטן ביז צו אונז (סופּרים קארט), קענען זיי זיך נאכאמאל טוישן. ד.מ., גארסוטש איז א מבין אז קואמא אדער כאטש וועלכער אנדערער פאליטישאן "קענען זיך שפילן", אויב עס קומט נישט איצט א פעסטער און קלארער באשלוס.
דער ריכטער שרייבט ווייטער: דער גאווערנאר האט באקעמפט דעם פאל אויף יעדן טריט און שריט. אוועקצושיקן רעליגיעזע פירער וואס ברענגען בארעכטיגטע קלאגעס בלויז ווייל דער גאווערנאר האט באשלאסן א קוועטש צו טאן דאס Off switch (אויסלעשן דעם מאטאר) אין שאטן פון אונזער איבערזיכט, וואלט אין מיינע אויגן געווען בלויז נאכאמאל מקריב זיין פונדאמענטאלע רעכטן אין נאמען פון יורידישע מעסיגקייט.
דאס איז טייל פון די גאנץ שארפע רייד וואס גארסוטש האט געלאזט הערן קעגן די קאומא ווירטשאפט קעגן די רעליגיעזע אנשטאלטן.
זיין שלוס פּאראגראף איז ציטירט געווארן אין א סאך פון די ערשטע באשרייבונגען פונעם דראמאטישן אורטייל. גארסוטש שרייבט:
עס איז שוין געקומען די צייט, ווייט נאך די צייט, קלאר צו מאכן, אז כאטש דער פּאנדעמיק שטעלט א סאך געפערליכע פּראבלעמען, איז נישטא די וועלט (בשום אופן) אין וואס די קאנסטיטוציע דולדעט קאליר-באצייכנטע עקזעקוטיווע פארארדענונגען (רויט-אראנדזש) וואס לאזט נאכאמאל עפענען משקאות געשעפטן און ביציקל שאפּס, אבער שליסט קירכעס, שולן און מעטשעטן.
כאטש דער קאנסערוואטיווער ריכטער סעמיועל עליטא האט נישט געשריבן אן אייגענעם אורטייל, איז אבער אין די פּרעסע באריכטן דערמאנט געווארן זיין שארפע רעדע פון גאנץ לעצטנס אין וואס ער האט דערקלערט אז די געריכטן האבן א וויכטיגע ראלע צו שפּילן ביים שיצן רעליגיעזע פרייהייטן נישט קיין חילוק צי עס איז יא דא א פּאנדעמיק אדער נישט. טאמער מען צוימט פונדאמענטאלע רעכטן, טאר זיך נישט דער סופּרים קארט אדער די אנדערע געריכטן שליסן די אויגן. ער האט אפּגעווארפן דעם געדאנק אז ווען אימער עס איז דא אן עמוירדזשענסי האבן עקזעקוטיווע באאמטע אומגעצוימטע מאכט וואס מען קען אפילו נישט איבערקוקן.
איצט האט עליטא געקענט "טוען צו די זאך" מיט צוימען קאומא'ס מאכט ווען ער טשעפּט מיט רעליגיע.
*
חרדי'שע אידן האבן גאר שטארק באגריסט דעם איצטיגן אורטייל, און נאכאמאל באדאנקט פּרעזידענט טראמפּ פאר ארויפשטעלן נאך א קאנסערוואטיוון ריכטער וואס וועט רעספּעקטירן רעליגיעזע רעכטן.
איצט וועט מען זען ווי אזוי קאומא וועט ווארשיינליך טוישן זיינע צוימונגען קעגן רעליגיע, איבערהויפּט ווען מען זעט ווי מערערע סופּרים קארט ריכטער האבן אפּגעשפּעט פון דעם קאומא סיסטעם וואס לאזט יא אפען סופּערמארקעטס און שאפּינג סענטערס אלס נויטיגע ביזנעס, וואו מענטשן דרייען זיך אפילו א לענגערע צייט ווי די קורצע צייט וואס זיי פארברענגען אין די געבעט הייזער.
עס איז אויך אינטערסאנט געווען אז די קאנסערוואטיווע ריכטער האבן פארשטאנען - בעסער געזאגט געדענקט וואס זיי האבן געליינט אין די פּאפּירן פון אבי שיק – אז דאס וואס קאומא האט געלייגט א מאקסימום פון צען מענטשן, איז דאס אליין ביי די אידן א דיסקרימינאציע, ווייל מען מוז דאך האבן צען מענער פאר מנין אין די ארטאדאקסישע שולן, מיינט דאס אז פרויען וועלן בכלל נישט טארן גיין אין שול, זיי פארלירן זייערע ערשטע אמענדמענט רעכטן צו פרייהייט פון רעליגיע!
אפילו אויב קאומא וועט דורכקומען מיט די אנקלעגער, אפילו אויב מען וועט נישט דארפן ווייטער קעמפן אין די געריכטן, איז אבער דער איצטיגער אורטייל געווען נאכאמאל ווי א שטיקל נס וואס איז געקומען בחצי הלילה, ווייל דאס שיקט א שארפן מעסעדזש פאר אלע רעגירונג אינסטאנצן אין לאנד, פון אויבן ביז אראפּ, אז דער נייער סופּרים קארט וועט זיך אננעמען פאר רעליגיע, נישט בלויז פאר די קאטאליקן און אנדערע קריסטן, און נישט בלויז פאר מוסולמענער וואס די מוסולמענער האבן אויך צוגעשיקט שטיצע צום סופּרים קארט לטובת די רעליגיעזע טענות, נאר אויך פאר אידן. האפנטליך וועט עס אבער מער נישט דארפן אנקומען צו קיין געריכטליכע קלאגעס.
דער אדוואקאט שיק האט אויך אנגעוויזן אלס באווייז ווי ערנסט די ריכטער האבן פארשטאנען דעם ענין, אז זיין ערשטע קלאגע איז אריין אין געריכט אקטאבער 6, דער צווייטער טאג חוה"מ, און מען האט שוין באקומען א גינסטיגן סופרים קארט אורטייל נאוועמבער 25, דאס איז א שנעלקייט וואס מען זעט זייער זעלטן אין יורידישן סיסטעם.
צווישן די באגריסונגען האט מען אויך געהערט פון די ניי-ערוויילטע קאנגרעס מיטגליד ניקאול מאליאטאקיס, וואס איר דיסטריקט אין סעטען איילאנד איז איצט אריין אין צוימונגען. זי האט ארויסגעברענגט ווי פאסענד עס איז אז דער אורטייל לטובת רעליגיע איז געקומען הארט פאר עס האט זיך אנגעהויבן די טענגסגיווינג חגא (12:00 טוישט זיך דער קאלענדאר טאג), וואס יענע פייערונג איז באשטימט געווארן אלס דאנק פאר'ן באשעפער דורך די פילגרימען וועלכע זענען רנגעקומען קיין אמעריקע פון ענגלאנד גענוי 400 יאר צוריק, נאכדעם ווי זיי האבן דורכגעלעבט דעם ערשטן שווערן ווינטער...