פאריגע וואך - נאך די ימים טובים ריש שתא תשע”ו - האט די צייטונג געטוישט זייער פארמאט צו די גאר קליינע סייז, געציילטע וואכן נאכדעם וואס “דער איד” האט דאס געטון.
ליינענדיג זייער אינטראדאקשען צום נייעם סייז, איז מיר זייער געפאלן די אפענע שפראך מיט קליענטן, מיטטיילענדיג אלע פיצינקע דעטאלן.
אבער במקום האפענקייט שם אתה מוצא ספיקות.
זיי ענדיגן צו:
פארשטייט זיך אז דאס קאסט טייערער, און מיר וועלן געצווינגען זיין צו העכערן די פרייז פונעם צייטונג נאך 7 יאר וואס מיר האבן געשלונגען די פארשידענע העכערע קאסטן.
דאס שטימט נישט אינגאנצן מיט די פריערדיגע פאראגראפן. וואס זיי לייגן אראפ די הויפט סיבה פאר’ן אוועקגיין פון די ביז יעצטיגע פירמע ווייל עס פלעגט נישט קענען ארויסקומען מיטוואך צופרי, משא”כ מיט די נייע פירמע גייט אלעס אויטאמאטיש און ראבאטיש, מיט מינימאלע ארבעט פאר מענטשן. די סייז טויש איז בלויז א סייד עפעקט פון אריבערגיין צו בעסערע טעכנאלאגיע, אבער נישט דאס איז געווען די ציל.
“פארשטייט זיך אז דאס קאסט טייערער”… ניין, עס פארשטייט זיך נישט אליינס, און עס דארף א הסבר, אויב ‘ווייניגער’ מענטשן זענען אינוואלווט דארף אראפגיין די פרייז נישט ארויפגיין. בעת פאר א מענטש דארף מען צאלן פער שעה ממון ודמים, דארף מען נישט צאלן פאר די מאשינען פער שעה, און די געלט פאר’ן קויפן די מאשינען צאלט זיך גאר שנעל אויס פאר די פירמע.
יעדע זאך וואס ווערט מער ראבאטיש גייט אראפ די פרייז, נישט ארויף די פרייז.
בנוסף צו דעם, דא רעדט איך שוין בשם מיר אליינס, ווען מען פרעגט מיך, דארף איך נישט די צייטונג מיטוואך צופרי אויב עס קומט מיט א פרייז העכערונג.
“פארשטייט זיך” אז דאס איז געשריבן געווארן בלויז לכבוד דעם וואס זיי פראבירן מסביר צו זיין עפעס וואס איך פארשטיי נישט.
אבער לגבי די עצם צייטונג, ווער איך פון פריש נתפעל יעדע וואך פון זייער ניווא. און איך וואלט שוין לאנג געקענט באשטיין אז זיי זאלן האבן קאמפעטישן, אבער דערווייל זענען זיי די איינציגסטע וואס מאכן מיך שפירן יעדע וואך אביסל עלטער ווי איך בין, אנשטאט אנדערע וואס מאכן מיך שפירן אינגער (וכמאמר המשנה: הוי זנב לאריות ואל תהי ראש לשועלים. ודו”ק. אז מען שפירט אז מען איז קלוגער ווי יעדעם מיינט אז מען איז נישט אינעם ריכטיגן פלאץ).
