נחום וואהלינער האט געשריבן:אור מנחם - בראשית
להגה"ק רבי מנחם שלמה מקאלוב זצוק"ל
אין דער עולם התורה והחסידות הערשט גרויס שמחה און צופרידנהייט בהגלות נגלות אור תעלומות, ספר 'אור מנחם' מכ"ק אדמו"ר בעל חקל תפוחין מקאלוב זכר צדיק וקדוש לברכה.
שטייענדיג שוין פערציג יאר זינט דעם פטירה פון האי צדיק וקדוש חסידא ופרישא, כ"ק מרן אדמו"ר רבי מנחם שלמה טויב זצוקללה"ה ממלא מקום אבותיו הצדיקים הקדושים לבית קאלוב, וועלכע איז נסתלק געווארן למתיבתא דרקיע ביום ד' שבט תשל"ח לפ"ק, איז מען אצינד זוכה צו א פרישע אור אין דעם קייט פון חידושי תורתו מיט וואס ער האט באלאכטען לארץ ולדרים עליה.
דער רבי זכרונו לברכה איז געווען א זוהן פון אביו הק' כ"ק מרן רבי משה'לע מקאלוב בעל עת רצון, א בן אחר בן פון רבינו הקדוש רבי אייזיק'ל קאלוב'ער זי"ע, און איז געווען שטענדיג דבוק בדרכי אבותיו הקדושים לבית זידיטשוב קאמארנא זיך נישט רירנדיג קיין זיז כלשהו מדרכי המסורה ומדברי תורתם הקדושים.
שוין בחיים חיותו בשנת תשכ"א האט ער אליינס געדרוקט מחידושי תורתו אינעם ספר 'חקל תפוחין', וועלכער איז בשעתו געווען א שם דבר אויך צווישן די גאונים וצדיקים פון יענעם דור, וועלכע האבן מפליא געווען כוחו הגדול בתורת הח"ן והחסידות.
עס האט פארציילט הגה"צ ר' אברהם ברוך ראזנבערגער זצ"ל דער גמזו'ער רב, אז ער איז אמאל אריינגעקומען צו הרה"ק מסאטמאר זי"ע און געזעהן דער ספר חקל תפוחין ליגן אויפן טיש, האט ער געפרעגט וואס זאגט דער רבי צום ספר, האט איהם דער רבי גענטפערט 'וואס זאל איך דיר זאגן, אין היינטיגן דור מיין איך פארשטייט ער דער בעסטער'.
אבער חוץ פון די חידושי תורה וועלכע זענען געדרוקט געווארן אינעם חקל תפוחין, איז געבליבן נאך פילע הונדערטער בויגנס פון חידושים נפלאים מלאים זיו ומפיקים נוגה, וואס אותו צדיק האט אפגעשריבן למשמרת למען יעמדו ימים רבים.
די הייליגע דברי תורה איז פון וואס ער האט משמיע געוועהן בשולחנותיו הטהורים ובסעודה שלישית, ווען מיט א חרדת קודש ואש דקדושה זענען ארויס מפום ממלל רברבן זיקוקין דנורא וביעורין דאשתא, ומילין לצד עילאה ימלל דברים נפלאים ומלהיבים אן קיין הכנה מוקדמת, ווי ער האט זיך אמאל אויסגעדרוקט 'איך זאג וואס מ'הייסט מיר'.
אויפן מהלך פון אבותיו הקדושים לבית זידיטשוב קאמארנא, איז אויפגעבויט געווארן בנינים נפלאים וחידושים מתוקים, עפ"י הקדמות מכתבי האריז"ל וספרי תלמידי הבעש"ט, צוזאמפלעכטענדיג מיט הפלא'דיגע גימטריאות ורמזים מתוקים לחיך מדבש ונופת צופים, דערביי זייענדיג מעורר לתשובה ותיקון המעשים ולהתחזקות בדרכי עבודת ה'.
הכל תלוי במזל אפילו ספר תורה שבהיכל, און יעצט נאך פערציג יאר מעת פטירתו לחיי עולם הבא זענען מיר זוכה צו א פרישע באנד מחידושי תורתו, בבחינת אין אדם עומד על דעת רבו עד ארבעים שנה.
אסאך יארן פון יגיעה און פלאג איז אריינגעלייגט געווארן דורך חברי מכון לקח טוב, מעריך צו זיין די חידושי תורה און מסדר זיין לדפוס, דערביי אויסקלויבענדיג די קטעים השוים לכל נפש און מסדר זיין מיט קלארע מראה מקומות און השוואות לספרי חסידות, ערמעגליכנדיג יעדער לומד צו שפירן די מתיקות הדברים ביתר שאת, ועוד ידם נטוי' ממשיך צו זיין מיט די הוצאה לאור פון די איבריגע כתבי קודש.
דער ספר אור מנחם וועלכער ערשיינט יעצט אויף סדר בראשית פארשפרעכט צו זיין א תענוג רוחני פאר אלע שוחרי תורה וחסידות בכלל און חסידי ומעריצי בית קאלוב בפרט, להתענג על ה' ולהתבשם מזיו אור תורת החסידות פון אותו צדיק וקדוש וועלכער האט פארשיינט דער וועלט באור קדושתו ותורתו.
קחו ברכה אל בתיכם.