אזוי ווי קיינער רופט זיך נישט אן, וועלן מיר מוזען פארקאטשען די ארבעל און אלץ א דבר בעתו ברענגען א ביסל וואס איז געווען געמאלדן אין די נייעס און וואס מיר ווייסען פון דער נאנט.
איך האב פאר מיר דער המודיע פון ח' טבת (עמודים 8-10) און די יתד פון עשרה בטבת (עמודים 91 און 97) אבער די אנהויב פון ארטיקל פעלט מיר און האב עס נישט געליינט. געזעהן אויפן קעפל פון 'מאמענט' אז זיי באשרייבן עס אויך אבער נישט געליינט.
דער 'פעלדערס שוהל' ווי דער גאס האט עס גערופען האט געדינט בארא פארק צענדליגער יארען, און א דאנק דאס בית המדרש האט זיך דער חלק פון בארא פארק אזוי שיין אנטוויקעלט און די כ' און ל' יארען.
הרב הערשל פעלדער זצ"ל איז אנגעקומען קיין אמעריקע מיט זיינע עלטערען אין שנת תר"פ אלט זייענדיג 6 יאר. זיין טאטע הרב אהרן פעלדער זצ"ל א תלמיד חכם און א תלמיד פון ערוגת הבושם זי"ע האט געוואוינט נאך די חתונה אין א קליינע גאליציאנער שטעטעלע Wola Michowa אין דער סאניקער געגענט און געהאט פרנסה פון זיין א זייגער מאכער.
https://en.wikipedia.org/wiki/Wola_Michowaווען דער באבובער רב זי"ע איז אנגעקומען קיין אמעריקע אין שנת תש"ו האט ער געדינגען פאכמאן אויס צו לערנען זיינע חסידים א פאך. געווען צוויי פאך שולע'ס, איינס צו לערנען זייגער מאכעריי און דער צווייטער צו קענען דער פאך פון פוריער furrier פון מאכען בגדים און שטריימלעך פון פעל. רבי אהרן פעלדער האט דארטן אויס געלערענט זייגער מאכעריי און רבי מאיר האראוויץ למשל איז געווען פון די וואס זענען געווארען זייגער מאכערס. זיי שרייבען אז די שולע איז געווען אין די וועסט סייד וואס איך מיין איז א טעות ווייל מיר האט מען געזאגט אז דער פוריער שולע איז געווען אין וויליאמסבורג אויפן צווייטן שטאק פונעם בנין וואס איז יארן שפעטער געווארן דער באבובער שטיבל אויף לי עוונעיו (געוועזענער קשאנובער בית המדרש) און כ'גלייב נישט אז עס איז געווען צוויי פלעצער.
רבי אהרן פעלדער האט געוואלט זיין זוהן רבי הערשל זאל זיך אויס לערנען א פאך אבער ער האט געוואלט בלייבן א כלי קודש און נאך די חתונה איז ער געווען א מלמד אין מאונטענדעיל ניו יארק. נאך די צווייטע וועלט מלחמה האט זיך הרב הערשל פעלדער באזעצט אין בארא פארק און גע'עפענט זיין שטוב פאר מנינים אויף דער 52'סטע גאס צווישען 16 און 17'טע עוועניו.
אין שנת תשי"ב האט הרב אהרן פעלדער אראפ געלייגט א דאון פעימענט פאר דער בנין אויף קארנער 49'סטע סטריט און אכצענטע עוועניו וואס דארט האט זיך אריין געצויגן זיין זוהן רבי הערשל און גלייך גע'עפענט זיין שטוב פאר מנינים וואס איז שנעל באוויסט געווארען ווי די פעלדערס שוהל.
ביז דאן האט זיך אידיש בארא פארק געצויגען ביז דער 16'טע עוועניו און דא און דארט האט איינער געוואוינט ביז 17, אבער צוליב די שוהל האט זיך דער געגענט צושפרייט און איבער גענומען דער חלק פון בארא פארק אויך. שפעטער (אין די סוף כ' יארען) איז צוגעקומען הרב אמסעל'ס בית המדרש, און אויך די קאסינער בית המדרש וואס האט אריין געברענגט א חסידישען טעם אין דער געגענט.
הרב פעלדער האט א נאמען געגעבן זיין שוהל 'בית אהרן' אלס א יישר כח צו זיין טאטן, און הרב פעלדער האט זיך אריין געלייגט לייב און לעבען צו טרעפען א מנין פאר יעדען חיוב וואס איז נאר אינטער געקומען. היצען און קעלט, זומער און ווינטער האט נישט צוריק געהאלטן הרב פעלדער פון איבער קערען די וועלט כדי צו מאכען זיכער אז א איד קען דאווענען פארען עמוד און זאגען קדיש.
זיין זוהן ר' שמחה דערציילט אז ער געדענקט נישט זיין טאטע זאל עמיצען עפעס בעהטען חוץ צוויי זאכען און דאס איז א שידוך פאר זיינע קינדער האט ער געקענט פרעגן אפילו פון איינעם וואס ער האט קיינמאל נישט פריער געזעהן, און אויך בעהטען א איד זאל קומען משלים זיין א מנין. ער דערציילט אז זיין טאטע איז אמאל אריין אין א רעסטאראנט קעגן איבער ווי עס האבען געגעסען א פאר פאלק און ער האט געבעטן דער פרוי זאל לאזען איר מאן קומען מיט אים משלים זיין א מנין. ער האט געקענט קומען מיט א קאר סערוויס ברענגען איינעם צום מנין.
ער דערציילט אז איינמאל איז געקומען צו זיין טאטע א פרעמדע איד פונעם אנדערע עק בארא פארק און געפרעגט צו ער קען דא דאווענען פאר דער עמוד שחרית. פרעגט אים הרב פעלדער וויפיל א זייגער ער דארף מנין, און דער איד ענטפערט 6:30. איז הרב פעלדער געגאנגען און גערופען מענטשן רעכטס און לינקס און איבער געדרייט דער שטאט אבער געמאכט פאר אים א מנין קבוע אין 6:30 צופרי.
פון דאס איז אויס געוואקסען א מנין פעקטארי וואס האט זיך געצויגען דאס גאנץ לעבן פון הרב פעלדער, אבער נאך דעם וואס עס זענען שוין געווען א סאך שוהלן אין דער געגענט איז געבליבען דער מנין פעקטארי נאר פאר מנחה און מעריב און בלויז איין מנין שחרית.
הרב פעלדער'ס חדר, נעקסט.