סטיטשינער האט געשריבן:בד"ה
הרב החסיד ר' יוסף ניימאן הי''ד
[align=center]
סוסמאן פארלאנגט מפנה צו זיין און פּאלמעסטן ר' יוסף ניימאן הי"ד![/align]
מייקל סוסמאן, דער קאנטראווערסיאלער אדוואקאט וועלכער פארטרעט דעם אנטיסעמיטישן מערדער גרעפטאן טאמאס, וועלכער האט דורכגעפירט די ברוטאלע אטאקע אין מאנסי מוצ"ש חנוכה, וואו עס זענען פארוואונדעט געווארן 5 אידן, און איינער פון זיי, ר' יוסף ניימאן ע"ה הי"ד איז געשטארבן פאר יו"ט פון די וואונדן, האט אריינגעגעבן א געזוך אין געריכט, אז מ'זאל ח"ו מפנה זיין דעם נפטר ר' יוסף ע"ה, כדי מ'זאל קענען דורכפירן א פּאלמעסונג רח"ל!
סוסמאן האט אריינגעגעבן דעם געזוך אין סטעיט געריכט, און ער האט דאס דערמאנט אין א בריוו וואס ער האט פאריגע וואך צוגעשיקט צו די פעדעראלע ריכטער קעטי סייבעל, וואס טאמאס איז אויך אונטער א גאר ערנסטע פעדעראלע אנקלאגע, אז ער האט פארלעצט די פעדעראלע האס געזעצן, וואס אויב מ'וועט דאס איצט העכערן צו א מארד קלאגע, ווייל ר' יוסף איז דאך געשטארבן פון זיינע וואונדן, קען טאמאס באקומען א מאקסימום טויט שטראף.
עס איז שוין חדשים וואס סוסמאן פירט א פּראפּאגאנדע קאמפּיין צו זוכן רחמנות אויף טאמאס, אז ער איז נישט געווען קיין אנטיסעמיט, נאר ער איז א גייסטיש קראנקער מענטש וואס אזוי ווי ער האט נישט גענומען זיינע מעדיצינען, איז ער נישט פאראנטווארטליך געווען פאר די אטאקע וואס ער האט דורכגעפירט אויף די אידן. די פעדעראלע פּראקורארן האבן אים אבער יא באשולדיגט אויך אויף אנטיסעמיטיזם, ווייל מ'האט געפונען ביי אים מערערע באווייזן אז ער איז יא געווען א וויסטער שווארצער אנטיסעמיט, מיט פארבינדונגען מיט א שווארצע אנטיסעמיטישע סעקטע. סוסמאן טענה'ט אבער, אז טאמאס ליידט שוין איבער צען יאר פון זיינע גייסטישע קרענק.
אין יאנואר, האט דאס פעדעראלע געריכט דערווייל געאורטיילט אז ער איז נישט אין א גייסטישן צושטאנד צו קענען מיטהאלטן זיין פּראצעס, האט מען עס דערוויילט אפּגעלייגט אויף שפּעטער.
איצט פארלאנגט סוסמאן, אז אזוי ווי מ'האט נישט געפּאלמעסט דעם אידישן נפטר, רעכענענדיג זיך מיט די אידישע הלכה, וויל סוסמאן אז מ'זאל אים ארויסנעמען פון זיין קבר, און ער האט שוין אפילו אנגאזשירט א געוועזענעם הויפּט מעדיקעל עקזאמינער פון ראקלענד קאונטי, וועלכער האט איינגעשטימט דורכצופירן די פּאלמעסונג פאר $300 א שעה. סוסמאן טענה'ט אז מען דארף פעסטשטעלן אז ער איז נישט געשטארבן פון עפעס א מחלה...
עס איז נישט קלאר פון סוסמאנ'ס בריוו וואס ער האפט ארויסצובאקומען פון אזא פּאלמעסונג ח"ו, ווען ר' יוסף איז דאך געלעגן 3 חדשים אין א באוואוסטלאזן צושטאנד, זיינע וואונדן זענען זייער קלאר דאקומענטירט געווארן דורך די דאקטוירים וואס האבן אים באהאנדלט און פּרובירט צו ראטעווען זיין לעבן. מ'האט געזען אז טאמאס האט אריינגעהאקט מיט זיין "שווערד" אינעם מח פון ר' יוסף ע"ה, אין צוגאב צו אנדערע ערענסטע וואונדן וואס ער האט אים פאראורזאכט. ממילא, וואס האפט סוסמאן "פעסטצושטעלן" פון אזא פּאלמעסונג, סיידן וויי צו טאן פאר משפּחת ניימאן בפרט, און פאר אלע ערליכע אידן בכלל, מיט זיין וויסטע אטאקע אויף כבוד המת רח"ל? האפט ער דורכדעם צו דערגרייכן א לייכטערע "פלי-בארגעין" שטראף פאר דעם אנטיסעמיטישן רוצח, וועלכער איז אויך דער הויפט פארדעכטיגטער אויף א פריערדיגע אטאקע אין מאנסי?
אויך האט סוסמאן פארלאנגט אז מ'זאל צושטעלן פאר אים אלע מעדיצינישע רעקארדס איבער די אלע חדשים פון ווען ר' יוסף איז אפּגעפירט געווארן אין שפּיטאל, און דערנאך אין א רעהאביליטאציע היים ביז צו זיין פּטירה. ריכטער סייבעל האט באשטעטיגט זיין פארלאנג פאר 6,000$ צו דעקן די קאסטן פונעם פאטאלאג וואס וועט איבערקוקן אלע מעדיצנישע רעקארדס. (דאס וועט אויך גענוצט ווערן אפצושלאגן דעם פאלמעסונג פארלאנג, אויב דער סוסמאן פאטואלאג וועט מוזן מודה זיין אז אלעס איז גענונג קלאר דאקומענטירט אז טאמאס האט גע'הרג'עט דעם איד.)
עס איז נישט קלאר ווען דאס סטעיט געריכט וועט אפּהאלטן א פארהער אויף סוסמאנ'ס פארלאנג, ביז דערווייל שאפט עס פרישע שברי לב פאר די ניימאן משפחה בפרט און פאר זיינע ידידים און אלע אידן בכלל, ווי מ'האט געזען פון זייער שארפע פארדאמונגען אויף דעם זעלבסט-האסענדן "איד" סוסמאן.
(קרעדיט: די צייטונג-אימעיל).