shalsheles האט געשריבן:עפל קאמפאוט האט געשריבן:געווען די וואך ביי א שבת שבע ברכות, דער מחותן האט נאר באשטעלט טורקי...
עס איז מיר געווען היבש א חידוש צו מאכן א שמחה בלויז מיט טורקי
הרה״ג דומ״ץ פאלטישאן שליט״א שרייבט אז מען פארדינט גארנישט פון עסן טורקי, איינס ווייל אויף טורקי בעצם איז געווען מערערים כידוע און אויך האט ער געהערט אז ביי טורקי מישט מען אויך מיט אנדערע מינים וואס האט זיכער נישט קיין מסורה.
כבר השיבו על דבריו מכח כמה צדדים. דער פאלטישאנער רב שליט"א שרייבט אז אולי מישט מען ביי טורקי אויך, און גם כפי השמועה מישט מען דארט, ממילא מה הועילו.
למעשה על פי הלכה איז נישט דא קיין שום סיבה חושש צו זיין סתם אזוי אז מען מישט, חוץ אז דער פארמער האט אפילו איינמאל געזאגט אז ער מישט, דעמאלס איז מבואר אין די פוסקים אז ער פארלירט זיין חזקה, אבער פון זיך אליין דארף מען בכלל נישט חושש זיין אז מען מישט.
ממילא ביי טורקי איז בכלל נישט דא די זאך אז די קאמפעני זאל זאגן אז מען מישט, פונקט פארקערט, עס איז דא כמה וכמה סייענטיסטן וואס זאגן קלאר אז ביי טורקי לוינט זיך נישט צו מישן, אנדערש ווי ביי טשיקענס, ממילא דארף איך זיכער נישט מורא האבן ביי טורקי אז מען מישט.
דער פאלטישאנער רב שרייבט נאר אז מען דארף חושש זיין אז מען מישט געווענליכע טורקי'ס מיט "וויילד טורקי'ס" וואס האט נישט קיין מסורה, למעשה שרייבט שוין דערוועגן אין קונטרס העוף און און נאך תשובות פון רבנים, אז עס איז נישט מבואר אין ערגעץ אז וויילד טורקי'ס זאל זיין ערגער ווי טורקי'ס וואס מען האדאוועט, די איינציגסטע פלאץ ווי מען טרעפט א חילוק פון עופות הבר און בני תרבות, איז ביי אווזות, ביי קאטשקעס, דארט איז מבואר די הלכה אז ווילדע קאטשקעס איז אנדערש ווי קאטשקעס וואס מען האדעוועט, ביי עופות שטייט נישט אין ערגעץ אזא חילוק, ממילא איז די ווילדע טורקי'ס פונקט אזוי מותר צו עסן ווי טורקי'ס וואס מען האדאוועט.
עוד יותר ווייזן אן אנדערע (ומבואר ג"כ בקונטרס העוף) אז ווען מען האט געברענגט טורקי'ס פון אמעריקע, איז דאס אויך געווען ווילדע טורקי'ס, און אויף "די" ווילדע טורקי'ס האט מען מכריע געווען להתיר אז דאס איז אן עוף כשר, ממילא זאלן זיי מישן מיט ווילדע טורקי'ס וויפיל זיי ווילן, עס איז נישט קיין שום פראבלעים.
אינטערשטע שורה, איז דאס נאר א גערעדאכטס פון מענטשן וואס ווילן אוועקמאכן די חומר הדבר פון די מציאות פון די היינטיגע האנט-געמאכטע עופות (וואס יעדע שטיק קומען די עופות מיט פרישע חידושים, אמאל מיט א גרעסערע באדאם, אמאל מיט א קלענערע, אמאל מיט מער ביינער אמאל מיט ווייניגער, די קאמפעני'ס דרייען כסדר ארום מיט די עופות דאס צו מאכן בעסער און פעטער, און מען זאל דאס שנעלער קענען עסן, זיי קומען כסדר ארויס מיט פרישע פארבעסערונגען אין די עופות, אז אונז האמיר נישט קיין אהנונג וואסערע רעסעפי זיי לייגן אלס אריין אונזערע עופות).
די מענטשן וואס ווילן אוועקמאכן די חומר הדבר פון די היינטיגע ברוילער, קורניש-ראק, וועלן זאגן נעה מען מישט טורקי'ס אויך, אבער למעשה איז נישט דא קיין איין בריוו פון קיין איין חוקר, פון קיין איין קאמפעני וואס פראווט אז מען מישט טורקי'ס, פונקט פארקערט עס איז דא פארשידענע בריוון פון חוקרים אז ביי טורקי'ס לוינט זיך נישט צו מישן מיט אנדערע עופות, (עיין מדברי החקורים בקובץ גינת ורדים מאמרו של הרב פרידמאן), און מען מישט טאקע נישט קיין טורקי'ס, עס איז א ריינער כשר'ע עוף. ממילא הייבט זיך נישט אן קיין שום חשש אויף קיין שום טורקי'ס, מען מעג דאס געזינטערהייט עסן, ויאכלו ענוים וישבעו.
בנוגע די אנדערע זאך איבער טורקי'ס, אז בעצם איז געווען אויף דעים מערערים, אויף דעים דארף מען אפילו זיך נישט מטפל זיין דערמיט, כי כל הפוסקים ממש (חוץ משפחה אחת משורש השל"ה הקדוש) האבן שוין מכריע געווען אז דאס איז מותר בלי שום פקפוק כלל, צדיקים קדושים שרפי מעלה האבן דאס געגעסן, דער בעל שם טוב ותלמידיו, ממילא דאס איז נישט קיין שום טענה ניטאמאל אלס א צירוף, טורקי איז א הייליגער און ריינער כשר'ער עוף, ברוך אתה השם אלקינו מלך העולם שהכל נהי' בדברו...