אין בית דוד סעמיטערי איז פאראן א
מציבה פון א ר' יוסף בורשטיין וועלכע איז געווען רב אין ווארשא, און בערך פערציג יאהר אין אמעריקא. דאס הייסט דאך אז אויב איז ער שוין נפטר געווארן אום תשי"ב איז ער שוין נישט געווען אין ווארשא פון בערך שנת תער"ב.
איך האב כמעט וואס, נישט געפונען קיינע פרטים וועגן דעם גאון, נאר אזויפיל אז דאהי אין אמעריקא האט ער אום
תרצ"א געצויגן אויף חיונה פון פארקויפן סת"ם געשריבן דורך אייראפעיאישע סופרים, ווי ס'פארשטייט זיך דערפון, איז ער זעלבסט קיין סופר נישט געווען, נאר בלויז דער סוחר.
אויך איז זיין נאמען אויסגערעכנט צווישן די מנויים אויף די בארימטע פילצאליגע ספרים פון האדמו"ר הה"צ ר' אורי לאנגנער מקנעהניטש זצ"ל.
איך געפון פון איהם א מודעה אום ת"ש אין
הפרדס (די לעצטע מודעה) ווי ער טוט אפעלירן איבער דאס פארקויפונג פון זיין ברודער'ס ספר
מטעמי יצחק, און ווי ער גיבט אן איז דאס אויך אן ענין פדיון שבויים צוליב דער מצב אין פוילן וועלכע איז איינגענומען דורך די דייטשן ימ"ש, ד.ה. אז ער האט געהאפט איהם אויסצולייזן פון דארט מיט די געלט וואס ער וועט לייזן פון די ספרים אויספארקויף.
זיין ברודער ר' יצחק איז געווען רב אין דער שטאט אוסטראלענקא, און טאקע דערפון קען איך געפונען א ביאגראפישע פונקט, וואס ווערט אנגעגעבן אין זיין ברודער'ס ערך אין דער
אהלי שם וואס דארט שטייט געשריבן דאס אז ער איז געבוירן אין לאמזא, דאס איז דערווייל די איינציגסטע ביאגראפישע פונקט וואס כ'קען געפונען וועגן די משפחה, ד.ה. אז די משפחה האט סיי ווען געוואוינט אמאל אין לאמזא.
דער לשון המציבה איז;
שמש בהוראה בווארשא ופה כארבעים שנה הייסט דאס אז ער האט דאהי יא משמש געווען אדער נישט? אויב יא ווי ווען וואס?
און הערט;
ומסר נפשו מתוך הדחק על קיום תומ"צ ומיוחד על ש"ק! געווען א גדול בישראל, און געדארפט האבן באזונדערע מסירת נפש אויף שמירת תומ"צ ושבת קודש...
נאך שטייט;
העמיד דורות מופלגי תורה בפולין שנהרגו עקה"ש הי"ד (דער מציבה פאנג זיך אן "אבינו היקר", דארף מען פארשטיין ווער עס איז יא געבליבן און ווער נישט) ווער זענען זיי געווען?
דערווייל איז ר' יוסף'ס ביאגראפיע א מיסטעריע, און אזוי אויך זיין ראלע אין דער ווארשאווער בית דין (אויב איז ער טאקע געווען אין בי"ד אדער א זעלבסשטענדיגער מו"צ), און דער סיבה וואס האט איהם אהער געברענגט קיין אמעריקא, און וואס זיינע אקטיוויטעטן זענען דאהי געוועזן, דאס וואלט איך זייער געוואלט וויסן בכדי איך זאל עס קענען שטעלן אויף איר ריכטיגן ארט אין מיין קונטרס פאר דעם בית דוד סעמיטערי.
====
אין
אהלי שם איז פארהאן א ר' מתתי' בורשטיין רב אין דער שטאט זאלאנטאנאשא, דער בעל אהלי שם איז נישט באקאנט מיטן פאטער'ס נאמען, אבער אינעם
כנסת חכמי ישראל שרייבט ער זיך אונטער מתתיהו ב"ר שלמה. דאס איז די זעלבע נאמען וואס עס האט געטראגן דער פאטער פון ר' יוסף מווארשא, ור' יצחק מאוסטראלענקע, איז אינטערעסאנט צו וויסן אויב ר' מתתי' מזאלאנטאנאשא איז געווען א ברודער מיט די צוויי דערמאנטע רבנים.