עס איז נאר א ווארט? ניין! עס איז א ווארט!!!

[איך_הער]

א ווארט בויעט
א ווארט צוברעכט,
א ווארט קען זיין גוט
א ווארט קען זיין שלעכט.

א ווארט שניידט
א ווארט פליקט,
א ווארט דערהייבט
א ווארט אונטערדרוקט.

א ווארט מונטערט
א ווארט דערקוויקט,
א ווארט פארשעמט
א ווארט דערשטיקט.

א ווארט מאכט טרויעריג
א ווארט דערפרייט,
א ווארט נעמט צוזאם
א ווארט צושפרייט.

א ווארט קען זיין צדקות
א ווארט קען זיין רשעות,
א ווארט ברענגט הנאה
א ווארט מאכט בושות.

א ווארט גראדט אויס
א ווארט קען מאכן א קנייטש,
א ווארט קען זיין געשמאק
א ווארט קען רייסן ווי מיט א בייטש.

א ווארט קען ווערן געזאגט
א ווארט קען קומען אין שריפט,
א ווארט קען מאכן ענג
א ווארט קען צוגעבן לופט.

א ווארט קען זיין זיס
א ווארט קען זיין א שטאך,
א ווארט קען זיין מיאוס
א ווארט קען זיין א בראך.

א ווארט קען זיין פרייליך
א ווארט קען זיין געשמאק,
א ווארט קען מאכן ווייטאג
א ווארט קען אין הארץ מאכן א קנאק.

א ווארט קען צונייען
א ווארט צורייסט,
א ווארט קען באגראבן
א ווארט קען פירן אין מאראסט.

א ווארט ווערט געזאגט דא און געהערט דארט,
פליט ארום אין מינוטן אין יעדן ארט.
א ווארט מען הערט, עס איז באלד א פאקט,
אפילו ווען יענער ווערט דערפון צוקנאקט.

מיט א קנעפל א דריק
צום חבר שיק,
מען לאכט ווי פון א טריק
אבער נישט דא קיין וועג צוריק,
דיר קאסט עס נאר אן אויגן בליק
אבער פון יענעם פעלט דערנאך א גאנצע שטיק.

עס האט ניש קיין סוף נישט דא קיין ענד
דער אנדערער דרוקט אויך פארווערד און סענד,
טראכסט נאר פון דיר און נישט פון יענעם
כאטש יענער וועט מיטמאכן דעם גיהנם.

דיר גייט גוט
אבער יענעם מען צאפט דאס בלוט,
דיר נעמט עס איין מינוט
יענער פאר טעג פון דערהיים אוועק ער פליט.

ווי מער מענטשן צולייגן צום ליסט
נאר אזוי שטילט זיך דיין גליסט,
אבער יענעם די בלוט גיסט
און טרערן פון די אויגן פליסט.

מען שיסט ווערטלעך מיט פסקים
און יענער קען ניש רוען אויף איין מקום,
א לשון הרע אויסגעטראכט
און מען פירט דאס ארום מיט פראכט,
און באלד איז דא א היתר
מיט שמוץ אנצופילן גאנצע בלעטער.

אפשר איז שוין צייט צו שרייען גענוג
און דרייען דעם דאשיק אויף צוריק,
אפשר איז שוין צייט צו שרייען הרף
און נישט האבן קיין האנט אינעם טרף.

מען דארף אלעס קענען דערהייבן
גארנישט טאר מען נישט גלייבן,
די ווארט זאל ביי דיר בלייבן
און טו עס נישט ווייטער טרייבן.

טראכט פונעם צער אן א שיעור
ווען עס וואלט חלילה פאסירט צו דיר,
טראכט איך וויל נישט עס זאל געשען צו מיר
שיק עס נישט ווייטער פון דיין טיר.

געב נישט אויפן סענד קנעפל א קלאפ
זאל די ווארט האבן ביי דיר די לעצטע סטאפ,
אינעם כבוד פונעם חבר זיין נזהר
וועט מען נישט דארפן פרעגן וואו איז-ער.

לאז עס ביי דיר אויפן בלעטל
וועט מען נישט דארפן איבער לאזן קיין צעטיל,
לאז עס ביי דיר שטיין
וועט מען פון דערהיים נישט דארפן אוועק גיין.

לאז עס ביי דיר ליגן
וועט מען זיך מיט קיינעם דארפן קריגן,
לאז עס ביי דיר אין האנט
וועט מען דערנאך נישט דארפן קלאפן קאפ אין וואנט.

לאז עס אין דרעפט
מאך נישט דערמיט קיין געשעפט,
לאז ביי דיר די סחורה
וועט ביי יענעם בלייבן אורה.

טראכט א וויילע
לאז עס ביי דיר אין כלי,
לאז עס ביי דיר אין קאמפיוטער
וועט יענער פון צער זיין פטור.

טראכט נישט קרום
דאס שיק ארום,
אפשר וועט דאס אומגלויבליכע פאסירן
אז מען זאל יענעם'ס צער באמת שפירן.

אין זכות פון אהבת חינם
זאל שוין זיין ראשון לציון הנה הנם,
מען וועט אונז גארניש זיין מחסר
ולירושלים אתן מבשר.

פון טהרה וועט בלאזן א רוח
און בקרוב הערן שופר של משיח,
אלע אינאיינעם
נערים וזקנים,
אנקומען אהיים
מיט משיח צדקנו קיין ירושלים.

איין ווארט! אמן!!!

[טייבעלע]

אמן ואמן!

א גרויסן דאנק פאר די טייערע ריינע רייד.

[יאנקעל פעדראטשיק]

אמן!!!
געצעם א קאווע פארן סעקרעטאר, ער קוקט אויס דאנערשטיג,
הישט געוויסט די קענסט דאס אויך?

[לכתחילה אריבער]

הו הא!! דברים כדורבנות, מייסטערהאפטיג אוועק געשטעלט!

[ענדע צדיק!]

אמן!

אויסטערליש. און שטארק.

[יאנקעלע קליגער]

WOW!!!
געוואלדיג וואס דער האט דא אהערגעשטעלט !

[ידיד]

מייסטערהאפטיג!! געוואלדיג גוט געשריבן!

[סופר סתם]

עד להפליא!.....

[מענטשעלע]

Wow wow הערליך

[פלטיאל]

עס איז נאר א ווארט? ניין עס איז א ווארט!!! אבער א ווארט!!! הערליך!!

[farshlufen]

א ווארט
אן Art
א ווארט
עס שטארט
איין ווארט
א פולע Cart

א דאנק, מיט עהרע
פאר די מוסר לערע
ישר חילך
שטענדיג זייט פריילעך.

[גערעכטער]

הערליך שיין!

[אויסערן מיניסטער]

מייסטערהאפטיג!! געוואלדיג גוט געשריבן!

[א גראם מיט טעם]

געשריבען מיט פארשטאנד
צו חזר'ן דאס נאכאנאנד
די כח אויף אייבעג פארבליבען
פון א ווארט געזאגט צו געשריבען
לאמיר עס אויסניצען לטב
צו האלטען יעדען אויף זעלבן קו
ווערטער נאר וואס שטארקען
אזוי אוועק נעמען יסורין הממרקין

[הלשון]

WOW!!!

אזא טיפזיניגע ווארט
מיר צוגענאגלט צום ארט

שוין לאנג נישט אזוי ארויס פון התפעלות!

[פארבינדן]

עס איז נאר א ווארט? ניין עס איז א ווארט!!! אבער א ווארט!!! הערליך!!

[נא_שכל]

מורא'דיגע ווערטער, געקונצלט ארייגעפלאכטן מאורעת הזמן, מיט שכל און מיט מיטגעפיל פאר א צווייטער איד. איך_הער!

[רביש]

לא מדובשיך ולא מעוקציך
ס'איז שפעט די זייגער רוקטזיך
משיח דארף שוין קומען וויל מדערשטיקזיך
מ'זאל נאר געראטעוועט ווערן ווען גוג קריגטזיך
לעג ולקלס וועט ווערן די וואס צו עבו"ז ביקטזיך

[SPUSMN]

אין איין ווארט, "געוואלדיג"!

האסט אזוי טאלאנטפול גענומען די ווארט און געוויזען אז איין ווארט קען רעדען מער ווי טויזענטער בילדער; דאס ווארט איז "ווארט".

#פיינע ווארט-זאגער פאר אייוועלט.

[נישט אלעס איז אמת]

א ווארט האט נישט קיין וועג צוריק

[מגיה]

צומאל איז א ווארט גאר הערליך
צומאל איז א ווארט גאר תוכנ'דיג
אבער פון מאל צו מאל איז עס גאר ביידע.

איך הער, ס'איז הערליך - און וויכטיג!

[יונהלע]

אוי ווי א ווארט קען טוישען די מענטש'ס לעבן! ! איך האב איינמאל געהאט א ווארט און איך ליידט נאך עד היום הזה פון איר...

[אידיש גערעדט]

מיינסט עס ערענסט ווי לאנג צוריק?...פונעם תגובה מייניך, איך האף אז דו ליידסט נאומאר.

[געשמאקער]

WOW!!!

אזא טיפזיניגע ווארט
מיר צוגענאגלט צום ארט

שוין לאנג נישט אזוי ארויס פון התפעלות!

הערליך איז נישט דאס "ווארט"

"אידיש גערעדט" שכח פארן ארויפברענגען

[אויסגערעכנט]

איך-הער האט ארויסגעברענגט א פוינט
וואס איז נוגע וואו נאר מען וואוינט.
די שכוח פאר זיין תגובה
איז צו לאזן די צובראכענע מנוחה.
קומט אים אלע אקעגן
ווען מען דארף עפעס טון דערוועגן.

בדידי הוא עובדה
מענטשן מיט די שלעכטע מידה.
פאר אפאר דאלער צו אויסזען גערעכט
האבן זיי מיין נאמען פארשוועכט.
געלייגט אויף מיר א ווארט
וואס האט קיינמאל פארנומען קיין ארט.
שווער איז עס מיר געווען
אבער איך האב געוויסט עס מוז געשען.
פון עגמת נפש האב איך מיר באפרייט
די לעבן איז מיר געווארן באנייט.

גאט איז מיר אקעגן געקומען
ווען די אמת איז ארויף געשווימען.
די ארומיגע זענען געווען שאקירט
זענדיג ווי ווייט מען האט זיי פארפירט.

אבער אז פון אויבן איז אזוי באשערט
איז יעדע ברעקל צער געווען ווערט.
ווייל געלערנט האב איך מיר דערפון
קיינמאל חברך תדין.

אזוי ווי איך בין שוין געווען אין אזא שיך
נעווער פארווערדן וועל איך.
אזא מעסידזש טו איך אייביג סטאפן
ווייל פארוואס יענעם קלאפן.
אמת צו נישט
קומט עס נישט צו זיין אויף טיש.

הערטס אויף צו מצער זיין א צווייטן
די זכותים וועלן אייך אייביג באגלייטן.
אז איר וועט איינזען די וויכטיגקייט פונעם ענין
ווען מען אונז שוין אראפשיקן די הייליגע בנין.
קיין ירושלים ווילן מיר גיין
במהרה בימינו אמן