א מייסטער-האפטיגער אינטערוויא מיטן מייסד הקרעטשמע "קרעמער"

געשמאקע ארטיקלן און בילדער וכדו'

די אחראים: אחראי, געלעגער

אוועטאר
למעלה משבעים
שר תשעת אלפים
תגובות: 9777
זיך איינגעשריבען אום: זונטאג מארטש 02, 2008 10:17 pm
לאקאציע: ערגעץ פארבלאנדזשעט אויף די גראדע וואסערן

א מייסטער-האפטיגער אינטערוויא מיטן מייסד הקרעטשמע "קרעמער"

תגובהדורך למעלה משבעים » דאנארשטאג יולי 04, 2013 5:48 pm

אויף די אנפראגע פונעם עולם שטעלן מיר דא ארויס דעם אינטערוויו פון קרעמער מען זאל דאס קענען איבערשמועסן אויפן פארום.


ארויסקומענדיג מיט די ערשטע אויסגאבע 'מי מנוחות' האבן אסאך אנגעפרעגט וואס איז דאס "אייוועלט" און וואס איז די באדייט דערפון. האבן מיר זיך פארבינדן מיטן מייסד און געבעטן צו פארציילן אביסל די היסטאריע פונעם פלאץ.

מיר האבן געגעבן א געלעגנהייט פאר די חשוב'ע ליינער אריינצושיקן זייערע פראגעס צום מייסד, און מיר ברענגן אייך די שאלות און תשובות.


פראגע: שלום וברכה. פון וואו שטאמט די נאמען "אייוועלט"?

ענטפער: דער ערפינדער פון דעם נאמען איז דער לעגענדארער "ארענדער" וואס לזכותו קען און דארף צוגעשריבן ווערן דער גאנצער פלאץ. ער האט גע'טענה'ט – מיט רעכט – אז דער פריערדיגער נאמען "היימישע קרעטשמע" איז זייער צוגעפאסט ווילאנג עס איז 'צווישן אונז גערעדט' (המכונה 'פנימי'), עס איז אבער נישט גענוג פארמאל צו קענען אפיציעל גענוצט ווערן אין די אלגעמיינע גאס. ער האט פארגעשלאגן מען זאל א נאמען געבן דאס פלאץ "אידישע וועלט", און אלס פארקורצונג – צו העלפן געדענקן די אדרעסע, און זיך בעסער איינצוגלידערן אין די טעכנאלאגישע וועלט און אירע קורצע טערמינען – האט ער דאס אנגערופן "אייוועלט".

פראגע: וויאזוי איז צושטאנד געקומען אזא זאך?

ענטפער: דער לעצטער פרעזידענט בוש וואלט געזאגט "דאס איז אן אנגעלאדנטע פראגע"... מען דארף צוריקדרייען דעם מח-זייגער מיט ארום צען יאר זיך צו דערמאנען פונקטליך ווען און וויאזוי די יסודות פון דעם ארט זענען געשאפן געווארן.

דער ליינער קרייז איז זיכער באקאנט מיט דעם טרויעריג-בארימטן איזראעלישן וועבזייטל וואס ווערט אנגערופן "היידפארק", על שם א פארק אין לאנדאן וואס טראגט דעם נאמען און איז באקאנט אלס אן ארט פון עפנטליכע ויכוחים (אמאל איז צוגעברענגט געווארן אויפן "וועלטל" א היציגע געפעכט אין די ווירקליכע היידפארק צווישן אונזערס א מיטגליד "אנעים זמירות" מיט – להבדיל – א ראסיסטישער ערל). דער ווירטואלער "היידפארק" דינט אויך אלס פארום פאר יעדן מיט אינטערנעט צוטריט אויסצודרוקן זיינע געדאנקן און זיך דינגן מיט דער וואס האלט אנדערש ווי אים.

וויבאלד "היידפארק" איז געגרינדעט געווארן פאר העברעאיש רעדנדע, האט עס אויטאמאטיש צוגעצויגן היימישע אידעלעך וועלכע דרוקן זיך בעסער אויס אויף די אידישע שפראך און טייפן פליסיגער אל"ף בי"ת ווי ענגלישע אלפאבעטן, און במשך די צייט האבן זיך געגרינדעט דארט פארשידענע פארומס פאר די אידיש רעדנדע געמיינדע.

ווען די ערשטע דור אינטערנעט שרייבערלעך האבן זיך דערזעהן מיט ווירטואלע מאסקעס אויף די פנימ'ער וואס ערלויבט זיי צו פארבלייבן אַנאָנים, האבן זיי זיך ליידער ערלויבט צו שרייבן ככל העולה על רוחם, און וויבאלד די גאס האט בשעתו שטארק געקאכט מיט היציגע פאליטיק (ליין: מחלוקת שלא לשם שמים), האבן די רכילות טרעגער און לשון הרע פאבריצירער זיך פיין באקוועם געמאכט דארט און טאג טעגליך געמישט דעם גרף של רעי מיט פרישע אנגריפן אויפן צד שכנגד.

שפירנדיג אז איך האב פארשידענס אויסצושמועסן, און נישט וועלנדיג אנטיילנעמען אין די היציגע פארומס, האב איך איין שיינעם טאג געגרינדעט א פרישע פארום מיטן נאמען "היימישע שטותים", וואו איך האב אנגעהויבן שרייבן מיינע געדאנקן אויף פארשידענע טעמעס וואס האבן מיר פאראינטערסירט. וויבאלד מיין ווינקל האט זיך געפונען אין אן אנדערן אפטיילונג פונעם פארק ("חברה וקהילה"), ווייט אוועק פון די אקטיווע פארומס, האט זעלטן ווער איבערגעטרעטן דעם שוועל, און נאך זעלטענער האט זיך איינער גענומען די מיה צו רעאגירן צו מיינע רייד.

נאכן אפן זיין א האלב יאר צייט בערך, האבן זיך שוין גענוג מענטשן דערוואוסט דערפון צו קענען ציען א שמועס, און דער פארום איז געווארן אביסל אקטיוו. די דעמאלטיגע טעמעס זענען געווען ווייט פון אינהאלטסרייך, אזוי אז דער נאמען האט זיך זייער גוט צוגעפאסט דערצו...

מיט די צייט האבן אנגעהויבן אריינפליסן פרישע ליינער און שרייבער וואס האבן זיך פאראיבלט פון די אנדערע מער אויפגעכאפטע לשון הרע פארומס, און ווען מען האט זיך דערזעהן מיט א צאל באזעסענע אידעלעך וואס זוכן אן אויסגעהאלטן ארט צו פארברענגן, האט מען איין שיינעם טאג (יום המיוחס תשס"ה) אויסגערייניגט אלע "שטותים", אויפגענומען "מנהלי משנה" וואס זאלן העלפן האלטן די שמועסן אויף די ריכטיגע רעלסן, און דער נאמען איז געביטן געווארן אויף "היימישע קרעטשמע".

היימישע קרעטשמע איז זיך צוביסלעך צואוואקסן, עס זענען געוואויר געווארן דערפון נאך און נאך פיינע שרייבער, בלויז צו דערמאנען אויפן שפיץ גאפל עטליכע פון די פיאנירן פונעם "קרעטשמע סטיל", א זאפטיגער אינגערמאן המכונה "יענטאאש", אן אייגנארטיגער שרייבער מיטן ניק-נאמען "נאטורליך" (וועמענס "קאנטרי טאגבוך", וואס לויפט יעצט אינעם "מי מנוחות", האט בשעתו ממש אריינגעבלאזן א רוח החיים אין קרעטשמע), א געשמאקער איד וואס האט זיך גערופן "התאחדות" און שפעטער "סאכדעס", און שפעטער "זארעכפעפער" וואס האט שטארק אויפגעלעבט דאס פלאץ מיט לענגערע אנאליזן און עדיטאריעלס, און אזוי ווייטער און ווייטער מערערע אקטיווע מיטגלידער וואס האבן פיל געלייסטעט צום אויפבליה פונעם פלאץ.

צווישן די וואס האבן זיך אנגעהערט און אנגעליינט פון דעם רואיגן אינזל אינעם רוישיגן ים, איז געווען א איד וואס האט שטארק הנאה געהאט פונעם אינהאלטסרייכן געזעמל, אבער האט אויסגעדרוקט אומצופרידנהייט פון דעם דעמאלטיגן לאקאציע. ער איז אויפגעקומען מיט עפעס וואס האט אויסגעזעהן ווי א ווילדע חלום, אריבערצופירן דעם גאנצן "קהילה" (יא, אמאל איז די ווירטשאפט געווען אויסגעשטעלט ווי א קהילה, מיט אן אזויגערופענעם 'דאיען', א ראש הקהל, וואלן א.ד.ג.) צו א זעלבסטשטענדיגע וועבזייטל וואס וועט העלפן די מיטגלידער זיך אפרייסן פון די ארומיגע פארומס וואס זענען ווייט נישט געווען לפי רוח התורה והיראה.

ווען ער האט מיר פארטרויעט דעם טרוים זיינעם, האב איך עס אנגעקוקט מיט פארדאכט. קען זיך דען אזא אינגע נארוואס-געגרינדעטע קהילה אריבערקלייבן צו א גענצליך פרישע געגנט? פון וואו וועלן מענטשן געוואויר ווערן דערפון? מען קען דאך חלילה אנווערן די גאנצע שווייס און פלאג פון אויפבויען דעם פארום אין אלט-שטאט (ווי מען פלעגט אנרופן 'היידפארק' נאכן זיך אוועקציען)?

אבער דער טייערער איד – וועמען איך האב געהאלפן אויסקלויבן זיין פאסיגן צונאמען "ארענדער" – האט נישט נאכגעלאזט, ער האט זיך אריינגעלייגט ראש ורובו אין די ארבעט פון אהערשטעלן אן אייגענע זייטל, און אקוראט זיבן יאר צוריק האבן זיך די ערשטע פאר ניקס איינגעשריבן אין "היימישעקרעטשמע.קאם". ווען ער האט איינגעזען אז עס איז צייט צו פארגרעסערן דעם לאקאל און צולייגן פרישע אפציעס, האט מען זיך ווידעראמאל אריבערגעצויגן צו א פריש פלאץ, און דאסמאל האט עס שוין באקומען דעם היינטיגן נאמען "אידישעוועלט.קאם".

פראגע: וויאזוי זענען געווארן מנהלים, אחראים, ווער נעמט זיי אויף און וואס איז זייער אויפגאבע?

ענטפער: אין אלט שטאט האט נאר געקענט זיין איין מנהל מיט דריי געהילפן (מנהלי משנה), ווען איך האב איינגעזען אין א געוויסן מיטגליד אז ער גיבט זיך אסאך אוועק לטובת דעם פלאץ, און יענער האט מסכים געווען צו נעמען אביסל אחריות, האב איך יענעם געקרוינט אלס מנהל משנה און ער האט געקענט מעקן און פארריכטן יעדע זאך וואס איז אקעגן די תקנות.

ווען מען האט זיך אריבערגעצויגן צום אייגענעם לאקאל, זענען די אלטע מנהלים געבליבן אויף זייערע פאזיציעס. נאר מיטן לויף פון די צייט ווען עס האבן זיך איינגעשריבן פרישע מיטגלידער אין די מאסן, און עס זענען צוגעקומען פארשידענע פארומס צום וועלטל (יעדע שטיקל צייט האט מען געמאכט א חנוכת הבית פאר נאך א שטובל, צב"ש "היימישע פארברענגן", "אידישע און וועלטליכע נייעס", "היכל הנגינה" און אזוי ווייטער און ווייטער), האט מען אויפגענומען עטליכע אחראים וואס זאלן צוהעלפן מיט די ארדענונג פונעם פלאץ.

צווישן די געוועזענע חברי הנהלה האבן זיך געציילט "יענטאאש", "פענסטער", "בן הרחמן", און "יאנאש". היינט צוטאגס באשטייט די הנהלה פון פינף געטרייע מנהלים: "טריאו" (אויך באקאנט אלס "דריי-מאל-נול"), "סאכדעס", "צייטליך", "זייער נייגעריג", און "למעלה משבעים". די אחראים זענען "מאשקע", "איך הער", "די פאקט", "געלעגער", און נאך עטליכע אחריות'דיגע מיטגלידער וועלכע טוען זייער ארבעט שטילערהייט אונטערן שלייער פון די ניקס "אחראי" און "גבאי ביהמ"ד".

ווער נעמט זיי אויף? געווענליך קומט פאָר א מנהלים מיטינג בעפאר מען נעמט אויף א פרישן מנהל אדער אחראי. די מיטינגען פלעגן אמאל פארקומען פנים אל פנים, אבער היינט וואס די חברי הנהלה אליינס וואוינען שטארק צושפרייט און עס איז שווער צוזאמצונעמען יעדן איינעם אונטער איין דאך (אין צוגאב צום גילוי פאקטאר, צו וואס מיר וועלן שפעטער צוקומען), מאכט מען א טעלעפאנישע קאנפערענץ וואס גייט צו אזוי ווי די אמאליגע קהל'ישע זיצונגען... מען ברענגט ארויף אויפן סדר היום פארשידענע ניק-נעמען וועלכע וואלטן געווען פאסיג צו ערפילן די נויטיגע פאזיציעס, מען נעמט אן אפשטימונג, און די באשלוסן ווערן געפאסט לויט די מיינונג פון רוב חברי ההנהלה.

וואס איז די אויפגאבע פון די מנהלים און אחראים? צוערשט דארפן זיי באשליסן אויב דער ניק וואס האט זיך נארוואס איינגעשריבן איז פאסיג צו ווערן אנגענומען (איז נאכנישט דא אן ענליכע ניק דערצו וואס קען ברענגן צומישונגען? איז דאס אן איידעלע ווארט? קען דאס נישט באדערן פאר איינעם?). דאן דארפן זיי האלטן אן אויג אויף יעדע תגובה וואס ווערט ארויפגעשטעלט אויפן וועלטל (קומט עס נאך די תקנות? איז עס בטעות געשטעלט געווארן צוויי מאל און מען דארף איינס ארונטערנעמען? איז עס אויפן ריכטיגן פלאץ אדער מען ברויך עס אריבערפירן ערגעץ אנדערש?). פון מאל צו מאל דארף מען זיך ספראווען מיט ניקס וואס קומען מיט טענות אקעגן די הנהלה אדער קעגן קאלעגע מיטגלידער, מען שמועסט זיך דורך אין פריוואטן פאסט קעסטל אהין און צוריק ביז מען קומט זיך אדורך בעזהשי"ת.

אין צוגאב צו זייער אפיציעלע פליכט צו האלטן דאס פלאץ אויסגעהאלטן און ריין, שטעלט זיך ארויס אז די מנהלים און אחראים שפירן אן אייגענע אחריות צו פארשענערן און פארבעסערן דאס פלאץ ברוחניות ובגשמיות, דאס ערקלערט די פארשידענע תקנות טובות וואס קומען צו במשך די יארן אויף די איניציאטיוו פון פארשידענע חברי הנהלה, ווי אויך די פארמעסטן און פראיעקטן וואס לעבן אויף דאס וועלטל צו יעדע צייט אפשניט (א שטייגער טאקע ווי די "מי מנוחות" אויסגאבע, א מח-שטורעם פון "געלעגער").

פראגע: וויפיל שרייבערס פארמאגט אייוועלט?

ענטפער: די צאל איינגעשריבענע ניקס קען מען כסדר זעהן אויפן הויפט זייט (יעצט בשעת'ן שרייבן די שורות: 3,207). אבער צווישן זיי געפונען זיך א היבשע צאל וואס האבן נאך גארנישט געשריבן, און א גרויסע צאל וואס פלעגן אמאל שרייבן אסאך אבער האבן מאיזה סיבה איינגענומען א שווייגעניש. דער פאקט איז אויך אז א געוויסע פראצענט פון אלע איינגעשריבענע זענען בלויז דאפעלטע און דריפלטע ניקס (זאל נישט אויסגערעדט זיין).

פראגע: וואס איז אייער בעסטע ארטיקל געווען דורכאויס די יארן?

ענטפער: דאכט זיך אז די בעסטע הומאריסטישע ארטיקל איז געקומען אין פארעם פון קלענערע תגובות אין אן אשכול גערופן "ברכת מזל טוב לכ"ק אדמו"ר שליט"א" (לרגל א שידוך שליסן ביים דעמאלטיגן ערשטע פאמיליע... איינער האט שפעטער צוזאמגעשמאלצן אלע קלענערע תגובות און געמאכט דערפון איין גרויסע ארטיקל, איך האב דאס ביי מיר אויפן קאמפיוטער אלס א פי.די.עף.). די בעסטע ערנסטע ארטיקל האב איך א נאמען געגעבן "רזא דקרעטשמע איהי קרעטשמע", איך האב יענעם ארטיקל געשריבן און איבערגעשריבן במשך א לענגערע צייט, און עס ליגט דערין א טיפע געדאנק בשייכות מיט די היסטאריע פון "היימישע קרעטשמע", ווי אויסגעשמועסט אויפן שפיץ גאפל אין די נאכפאלגנדע קאמענטארן ביי יענעם אשכול.

פראגע: וויאזוי איז טאקע מעגליך צו האלטן אזא פלאץ אזוי ריין פון אלע לשה"ר און מחלוקת וואס קאכן זיך אין די גאסן?

ענטפער: דער קורצער ענטפער איז "ווייל דאס איז דער ווילן פון די מיטגלידער". מיר אלע ווייסן זייער גוט די עקלהאפטיגקייט פון זיך באשמוצן און ארונטעררייסן איינער דעם צווייטן בלויז ווייל יענער האלט אנדערש ווי מיר אין א געוויסע פאליטישע טעמע, דערפאר זענען מיר איינגעשריבן אויף א פלאץ מיט פעסטע תקנות און א שטארקע צענזור אויף אלעס וואס איז נישט אין איינקלאנג מיט די תורה הקדושה. און אויב עס מאכט זיך אמאל אז איינער ווערט איבערגענומען פון די היץ אין גאס און פארלירט זיך אויפן מאמענט, ווייסט ער פון פאראויס אז זיינע ווערטער וועלן פארשוואונדן ווערן דאס שנעלסטע וואס מעגליך, און צומאל וועט ער באקומען א דערמאנונג/ווארענונג אין פריוואטן פאסט קעסטל אז דאס זאל מער נישט פאסירן.

פראגע: איז דא עפעס פאלעסיס וויאזוי און וואס מ'מעג באריכטן אז עס זאל נישט הייסן פאליטיק?

ענטפער: דער כלל איז שטענדיג געווען אז שרייבער ברויכן נוצן זייער אייגענע פארשטאנד וואס און וויאזוי צו מעלדן באריכטן. א באריכט וואס איז געשריבן געווארן מיט א היציגע טאן אדער בייסיגע אונטערטאָן ווערט פארשוואונדן פונעם האריזאנט, בעת דאס זעלבע נייעסל קען שיין אויסגעשמועסט ווערן פון אלע זייטן אויב דאס איז באשריבן געווארן דורך א געניטער שרייבער מיט אן אביעקטיוון בליק.

פראגע: האט מען זיך שוין אנגעשטויסן אין רבנים וואס זאל פארפירן וועגן איי-וועלט?

ענטפער: דאכט זיך אז עס איז דערווייל נישט געווען קיין שום עפנטליכע מחאה דערקעגן. וליתר שאת זענען צוויי פון די חברי הנהלה פאראיאר נאכן גרויסארטיגן "כינוס כלל ישראל" אראפגעפארן צו א פראמינענטער רב און אים פארגעלייגט דאס גאנצע צוזאמשטעל פונעם ארט מיט אלע תקנות און דערגרייכונגען, אנפרעגנדיג דעם דעת תורה איבער דעם צוקונפט פון "אייוועלט". כאטש יענער האט זיך ארויסגעדרייט פון געבן א הסכמה בכתב אויף א וועבזייטל, האבן זיי באקומען א פאזיטיווע צושטימונג ווייטער אנצופירן דאס פלאץ.

עס איז אונז אויך א חיזוק דער פאקט אז די שטרענגע פילטערס וואס ווערן לעצטנס פארלאנגט דורך די היימישע קהילות, עפענען אויף "אייוועלט" פאר זייערע באנוצער מיט א בלויזע פארלאנג.

פראגע: ווער איז דער בעל מחבר פון די ברייט באקאנטע אויסדרוק "גילוי"? האט מען שוין אסאך שאדן געהאט צוליב גילוי?

ענטפער: "גילוי" איז מיטגעקומען פון אלט שטאט... איינע פון די תקנות פון היידפארק איז אז מען טאר נישט אנטפלעקן ווער עס באהאלט זיך אונטער א ניק. עס איז א זעלבסטפארשטענדליכע זאך, און נישט מער ווי יושר און מענטשליכקייט צו לאזן יענעם בלייבן אנאנים אויך נאכדעם וואס איינער איז באיזה אופן געוואויר געווארן זיין אידענטיטעט. מיר האבן אין די פארגאנגענהייט פארלוירן עטליכע שרייבער נאכדעם וואס זייער אידענטיטעט איז געווען אין געפאר פון אנטדעקונג.

פראגע: ווי אלט איז דער עלטסטער שרייבער אויפן וועלטל (וואס מ'ווייסט פון)?

ענטפער: מיר פארלאנגן נישט קיין געבורטסשיין ביים זיך איינשרייבן, אבער פון די עדות'שאפטן פון מיטגלידער פארמאגן מיר צווישן אונז עטליכע וואס מאכן שוין חתונה אייניקלעך בליעה"ר, און איך בין פערזענליך באקאנט מיט איין "עלטער זיידע" וואס שרייבט אויפן פארום.

פראגע: וויאזוי האט אייך אפעקטירט דאס פארלאזן די ווירטואלע אידישע וועלט בשעת אייערע פריינט די עכטע וועלט זענען נאך דארט. אין אנדערע ווערטער ווען איר שמועסט מיט א ידיד וואס איז נאך אויף אייוועלט אדער איר טרעפט "צייטליך" און ער זאגט עפעס, און 'בום'..., איר ווייסט נישט פון וואס ער רעדט. צו פאסירט דאס אמאל, און וויאזוי אפעקטירט עס אייך?

ענטפער: איך האב טאקע אויפגעגעבן מיין פאסטן און ניק נאמען, אבער איך דריי מיך נאך אלץ ארום אין די קארידארן פון אייוועלט. פאראיאר נאכן זיך אפגעזעגענען האב איך גראדע פרובירט אוועקצושטיין דערפון אויף א לענגערע צייט, מיט די האפענונג איבערצומישן דאס בלעטל אויף אייביג, אבער מיט די צייט האט זיך ארויסגעשטעלט אז איך האב צופיל אינוועסטירט אויף דעם ארט צו קענען איבערהאקן דערמיט אלע באציאונגען...

פראגע: וואס וועט איר טון ווען איינער פון אייערע קינדער וועט אונטערוואקסן און נאכן חתונה זיך איינשרייבן אין אייוועלט און אייך דאס דערציילן, וועט איר אים פארציילן וויאזוי איר האט דאס געבויט און שפעטער אוועק דערפון וכו׳?

ענטפער: איך זעה נישט פארוואס די קומענדיגע דור זאל מיטטיילן מיט אונז א זאך וואס מיר האבן נישט געשפירט פאר נויטיג מיטצוטיילן מיט אונזערע עלטערן... אבער צו ענטפערן די פראגע: איינער וואס דרייט זיך אויף "אייוועלט" און ווייסט דאס חשיבות פונעם פלאץ, וועט נאר ארויפקוקן און שעצן אירע גרינדער און פירער, בעת א דרויסנדער וואס האט א שלעכט אויג אויף יעדע זאך וואס קערט זיך אן מיט 'אינטערנעט' וועט קיינמאל נישט פארשטיין די מעלות דערפון.

איך וועל אייך מיטטיילן א מעשה שהיה דערוועגן. איינער פון אונזערע הנהלה לייט האט אמאל באקומען א טעלעפאנישע רוף פון זיינע עלטערן מיט א היסטעריע אז זיי האבן באקומען א גריס אז "זייער זוהן פירט עפעס אָן אויף די אינטערנעט"... די עלטערן זענען געווען אין א פאניק, ביי זיי איז דער אינטערנעט דער שאול תחתית אליין, און אז זייער זוהן איז גאר אן אנפירער דארט איז דאך דאס א בשורת איוב רח"ל. וואלט דער טאטע מיטגעהאלטן פון דער נאנט וואס "אייוועלט" איז, און געזען וואספארא תוכנ'דיגע תגובות דער זוהן שרייבט, וואלט ער געקוואלן פאר נחת פון דעם געלונגענעם זוהן וואס מיר אלע האבן הנאה פון אים טאג טעגליך!

אלזא ווענדט זיך אלעס אין דעם פרעגער. אויב איז ער באקאנט מיט "אייוועלט" און אירע אויפטוען, וועט מיר זיין א שטאלץ צו דערציילן מיין חלק אינעם גרינדונג, אבער אויב איז יענער אומבאהאוונט אין די סוגיא, וועל איך מיר פארבייסן די ליפן פאר מיין אייגענע טובה.

פראגע: וואס וועט איר זאגן ווען איינער וועט אייך איבערשטייגן מיט די מספר תגובות אויפן וועלטל?

ענטפער: "מזל טוב פארן שרייבער מיט די מערסטע תגובות".

פראגע: באקומט איר אמאל היטשעס פון קרעטשמע אידן וואס זענען אקארשט געוואויר געווארן ווער דער קרעמער איז און ווילן אים זעהן און כאפן א שמועס מיט אים?

ענטפער: זינט איך בין ארויס פון דא, בין איך שוין עטליכע מאל געווען ביי פארשידענע קומזיצן און שמחות פון היזיגע חברים, און זיך שוין באקאנט געמאכט מיט אפאר פרישע מיטגלידער.

פראגע: איר געדענקט נאך אייער פעסווארד אדער איר זענט אויסגעשפארט?

ענטפער: איך געדענק נאך דעם פעסווארד, אבער זינט מיין פריוואטע פאסט קעסטל איז אפגעשלאסן געווארן און איך האב באשלאסן מער נישט צו נוצן דעם ניק-נאמען צו שרייבן תגובות, בלייבט מיר נישט קיין אורזאך אריינצוסיינען דערין.

פראגע: אויב איר וועט אמאל צוריקקומען אויפן וועלטל, וועט איר קומען מיטן קרעמער ניק אדער איר וועט זיך מאכן א נייע ניק?

ענטפער: זעהט מיין פריערדיגע ענטפער.

פראגע: אויב דארפסטו אויסוועלן איין זאך, וועלכע זאך וואלסטו אנגערופן די גרעסטע עררייכונג פון אייוועלט? למשל, קענסט זאגן די חלק ה'ביזנעס, אז מענטשן העלפן זיך איינער דעם צווייטן, יונגעלייט זענען געווארן ביזנעסלייט דורך אייוועלט... אדער עני אנדערע מעידזשער דערגרייכונג...

ענטפער: אין מיינע אויגן איז די גרעסטע דערגרייכונג דער בלויזער פאקט אז דאס האט צוגעשטעלט פאר ערליכע אידן וואס קלאמערן זיך אנצוהאלטן די תורה לויט אונזער מסורה א רואיגע ווינקל אינעם רוישיגן גאס צו זיצן און פארברענגן "על טהרת חולין" (ווי איך גלייך עס אנצורופן) און נישט דארפן זיין אויסגעשטעלט צו כפירה ומינות, בזיון ת"ח, לשון הרע ומחלוקת, און ניבול פה רח"ל. (דאס ווערט פאסיג ארויסגעברענגט אין די קורצע דברי חיזוק וואס איינער פון די שואלים האט מיר צוגעשריבן נאך זיין פראגע: יעצט אז איך שרייב שוין, וויל איך דיר באדאנקען פון טיפ'ן הארצן פאר אלעם וואס דו האסט געטוען פאר'ן וועלטעל. זאלסט וויסן אז ס'האט שוין אסאך יונגעלייט געראטעוועט פון אריינפאלן אין שאול תחתית, ווייל זיי האבן נישט געהאט קיין כשר'ע פלאץ וואו זיך צו דרייען. "שכרך הרבה מאוד").

ווי געזאגט איז דאס דער שפיץ פון אלע דערגרייכונגען. אבער יכלה הזמן והם לא יכלו אויסצורעכענען די פולצאליגע אויפטוען פון "אייוועלט" און אירע לייסטונגען פאר די ווירקליכע "אידישע וועלט". און באמת איז איינפאך איבריג דאס אויסצושמועסן באריכות ווען איר קענט זיך דאס איבערצייגן מיט די אייגענע אויגן אין בלויז אפאר מינוטקעלעך... איר ברויכט נאר כאפן א בליק אין "בית המדרש דקהילתינו", וואו איר וועט זיך גלייך אנטרעפן אין ערנסטע תורה'דיגע שמועסן, אנגעהויבן פון פרשת השבוע און געענדיגט ביי א הערליכע היכי תמצא אדער א מקור אויף א מנהג ישראל. באטראכט אביסל די "זכור ימות עולם" אפטיילונג, וואו די מיטגלידער האבן גאנץ לעצטנס אנגעהויבן דאקומענטירן אלטע בתי חיים מיט בילדער פון מציבות און נעמען פון נפטרים, און אנדערע האבן אונטערגענומען א מאסיווע פראיעקט צו פארצייכענען אלע פרענומעראנטן פון ספרים במשך די דורות. זעהט ביטע ביי "איש את רעהו יעזורו" וואו צענדליגער אידן ווערן טעגליך געענטפערט אויף אלע סארט אנפראגעס, אנגעהויבן פון א פשוט'ע טעלעפאן נומער (411 סערוויס) ביז א קאמפליצירטע פראגע אין פראגראמינג א.ד.ג., יעדער ווערט געענטפערט דורך א קאלעגע בשפה ברורה ובנעימה באהבת ודיבוק חברים, אז עס שרייט פון זיך ארויס "מי כעמך ישראל"!

אוועטאר
דער תהילים איד
שר ששת אלפים
תגובות: 6353
זיך איינגעשריבען אום: זונטאג יולי 26, 2009 9:54 pm

תגובהדורך דער תהילים איד » דאנארשטאג יולי 04, 2013 6:28 pm

WOW! וואס איך ליין נישט דא!

קרעמער איז געהעריג מיט אונז, אונטר א צווייטן ניק-נעים!
רבינו שאג בקול גדול וגו'

אוועטאר
לכתחילה אריבער
שר עשרת אלפים
תגובות: 19991
זיך איינגעשריבען אום: זונטאג מאי 09, 2010 7:20 pm
לאקאציע: למטה מעשרה

תגובהדורך לכתחילה אריבער » דאנארשטאג יולי 04, 2013 6:38 pm

דער תהילים איד האט געשריבן:WOW! וואס איך ליין נישט דא!

קרעמער איז געהעריג מיט אונז, אונטר א צווייטן ניק-נעים!

כ'האב שטארק הנאה געהאט, ווייל ווען ער האט געמאלדען אז ער גייט, האט מיך בעיקר געבאדערט אז ער וועט שוין נישט הנאה האבן צו זעהן זיין ארבייט אנגיין ווייטער, און ווי הונדערטער זענען זיך מחי' מיט זיין ווערק. אצינד אז כ'הער אז ער ליינט דא, האבעך הנאה.
"די וועלט זאגט אז מען קען ניט ארונטער דארף מען אריבער, און איך האלט אז מ'דארף לכתחילה אריבער" - אדמו"ר מהר"ש

אוועטאר
פאטאקי08
שר עשרת אלפים
תגובות: 11239
זיך איינגעשריבען אום: דאנארשטאג אוגוסט 09, 2007 1:30 pm
לאקאציע: בקרוב אין וואשינגטאן

תגובהדורך פאטאקי08 » דאנארשטאג יולי 04, 2013 7:10 pm

א דאנק פארן אהערברענגן

פארוואס איז די פארזעצונג פון אב זקן נאר פאר די מי מנוחות אויס-גבאי?
די זעלבע מיטן זיבעצען און אלע אנדערע ארטיקלען
פארוואס זאלן מיר וואס האבן נישט גענוג טינט אין פרינטער אויך נישט הנאה האבן?

למה נגרע?

אוועטאר
טייבעלע
שר עשרת אלפים
תגובות: 10261
זיך איינגעשריבען אום: מיטוואך ינואר 11, 2012 4:00 pm
לאקאציע: ביי אלאסקא

תגובהדורך טייבעלע » דאנארשטאג יולי 04, 2013 7:17 pm

א דאנק פאר צושטעלן דער אינטערוויו.

א ספעציעלער דאנק פאר קרעמער אויף זיך צושטעלן און ענטפערן, ענדליך זיך געלאזט הערן, א דאנק.

אן עכטער פארגענוגען געוועהן דאס ליינען.

א דאנק.
יונתי בחגוי הסלע בסתר המדרגה הראיני את מראיך השמיעני את קולך כי קולך ערב ומראיך נאוה: (שה"ש ב יד)
1teibele@birdlover.com

אוועטאר
דער תהילים איד
שר ששת אלפים
תגובות: 6353
זיך איינגעשריבען אום: זונטאג יולי 26, 2009 9:54 pm

תגובהדורך דער תהילים איד » דאנארשטאג יולי 04, 2013 8:18 pm

לכתחילה אריבער האט געשריבן:
דער תהילים איד האט געשריבן:WOW! וואס איך ליין נישט דא!

קרעמער איז געהעריג מיט אונז, אונטר א צווייטן ניק-נעים!

כ'האב שטארק הנאה געהאט, ווייל ווען ער האט געמאלדען אז ער גייט, האט מיך בעיקר געבאדערט אז ער וועט שוין נישט הנאה האבן צו זעהן זיין ארבייט אנגיין ווייטער, און ווי הונדערטער זענען זיך מחי' מיט זיין ווערק. אצינד אז כ'הער אז ער ליינט דא, האבעך הנאה.

צ"ל שרייבט דא, כפי מה שהבנתי בדבריו.
רבינו שאג בקול גדול וגו'

אוועטאר
לכאורה
שר עשרת אלפים
תגובות: 11701
זיך איינגעשריבען אום: דינסטאג אוקטובער 20, 2009 2:43 pm

תגובהדורך לכאורה » דאנארשטאג יולי 04, 2013 8:24 pm

דער תהילים איד האט געשריבן:
לכתחילה אריבער האט געשריבן:
דער תהילים איד האט געשריבן:WOW! וואס איך ליין נישט דא!

קרעמער איז געהעריג מיט אונז, אונטר א צווייטן ניק-נעים!

כ'האב שטארק הנאה געהאט, ווייל ווען ער האט געמאלדען אז ער גייט, האט מיך בעיקר געבאדערט אז ער וועט שוין נישט הנאה האבן צו זעהן זיין ארבייט אנגיין ווייטער, און ווי הונדערטער זענען זיך מחי' מיט זיין ווערק. אצינד אז כ'הער אז ער ליינט דא, האבעך הנאה.

צ"ל שרייבט דא, כפי מה שהבנתי בדבריו.

איך האב פארשטאנען ווי לכתחילה-אריבער.
איך בין צוריקגעבליבן מיט טויזנטער אשכולות, אבער איך געב נישט אויף... שטייטליך און צוביסלעך וועט מען אי"ה "ווייס מאכן די קרעטשמע"

אוועטאר
דער תהילים איד
שר ששת אלפים
תגובות: 6353
זיך איינגעשריבען אום: זונטאג יולי 26, 2009 9:54 pm

תגובהדורך דער תהילים איד » דאנארשטאג יולי 04, 2013 9:02 pm

קרעמער האט געשריבן:איך האב טאקע אויפגעגעבן מיין פאסטן און ניק נאמען, אבער איך דריי מיך נאך אלץ ארום אין די קארידארן פון אייוועלט. פאראיאר נאכן זיך אפגעזעגענען האב איך גראדע פרובירט אוועקצושטיין דערפון אויף א לענגערע צייט, מיט די האפענונג איבערצומישן דאס בלעטל אויף אייביג, אבער מיט די צייט האט זיך ארויסגעשטעלט אז איך האב צופיל אינוועסטירט אויף דעם ארט צו קענען איבערהאקן דערמיט אלע באציאונגען...

ער זאגט נישט אז ער ליינט בלויז.. שטימט?
רבינו שאג בקול גדול וגו'

אוועטאר
פליגל
שר ארבעת האלפים
תגובות: 4516
זיך איינגעשריבען אום: פרייטאג סעפטעמבער 04, 2009 1:27 pm
לאקאציע: ביים פענסטער

תגובהדורך פליגל » דאנארשטאג יולי 04, 2013 9:07 pm

עס איז בכלל ניט מרומז אז ער שרייבט נאך דא.
נאט אייך א גרינע...


מומחה עצום

תגובהדורך מומחה עצום » דאנארשטאג יולי 04, 2013 9:23 pm

דרייען אין די קארידארן וואס מיינט?

אוועטאר
מאנ-יימער
שר עשרת אלפים
תגובות: 10552
זיך איינגעשריבען אום: מיטוואך דעצמבער 14, 2011 10:36 am
לאקאציע: אויפן וועג ארויף

תגובהדורך מאנ-יימער » דאנארשטאג יולי 04, 2013 9:25 pm

דרייען אין די קארידארן מיינט נישט אז ער ליינט.
ווער זאגט?... ער האט געזאגט איז וואס?... נו! האט ער געזאגט, ווער איז ער צו זאגן?

מי חכם
שר ארבעת האלפים
תגובות: 4080
זיך איינגעשריבען אום: זונטאג מארטש 13, 2011 2:02 pm

תגובהדורך מי חכם » דאנארשטאג יולי 04, 2013 11:39 pm

געווען דא אמאל א שרייבער badatz. ער האט געשריבן ווי ער וואלט געווען עפעס א זקן מופלג. וואס איז מיט אים היינט? נישטא קיין ווייפיי אין אשל?

בכלל אבער, וויפיל איז דער עווערעזש עידזש פון די שרייבערס דא? 25 - 35?
מִ֚י כְּהֶ֣חָכָ֔ם וּמִ֥י יוֹדֵ֖עַ פֵּ֣שֶׁר דָּבָ֑ר חָכְמַ֤ת אָדָם֙ תָּאִ֣יר פָּנָ֔יו וְעֹ֥ז פָּנָ֖יו יְשֻׁנֶּֽא׃

אוועטאר
פאטאקי08
שר עשרת אלפים
תגובות: 11239
זיך איינגעשריבען אום: דאנארשטאג אוגוסט 09, 2007 1:30 pm
לאקאציע: בקרוב אין וואשינגטאן

תגובהדורך פאטאקי08 » פרייטאג יולי 05, 2013 12:07 am

קרעמער שרייבט דארט אז די ערשטע פארום האט געהייסן היימישע שטותים
אויב אזוי איז די ניק קרעמער נישט געווען דער מיסד
קרעמער איז לכאורה געבוירן געווארן נאכן מופן
נישט אזוי?

אוועטאר
פאטאקי08
שר עשרת אלפים
תגובות: 11239
זיך איינגעשריבען אום: דאנארשטאג אוגוסט 09, 2007 1:30 pm
לאקאציע: בקרוב אין וואשינגטאן

תגובהדורך פאטאקי08 » פרייטאג יולי 05, 2013 12:13 am

אינטערסאנטע זאך זעה איך אז יום המיוחס איז א גרויסער טאג בינונז
אין דעם טאג איז קרעטשמע געבוירן אין אינעם זעלבן טאג האט זיך קרעמער געזעגענט

אוועטאר
לכאורה
שר עשרת אלפים
תגובות: 11701
זיך איינגעשריבען אום: דינסטאג אוקטובער 20, 2009 2:43 pm

תגובהדורך לכאורה » פרייטאג יולי 05, 2013 12:15 am

פאטאקי08 האט געשריבן:קרעמער שרייבט דארט אז די ערשטע פארום האט געהייסן היימישע שטותים
אויב אזוי איז די ניק קרעמער נישט געווען דער מיסד
קרעמער איז לכאורה געבוירן געווארן נאכן מופן
נישט אזוי?

די ניק קרעמער קומט נאך פון אלט שטאט, כאפ א בליק אין די ערשטע אשכולות דארט וועט דיר קומען צום לאכן ווי דער עולם האט געהעריג גערעדט צו זיך אליין... קרעמער מיט זיין אנדערע ניק און קרעמער אליין האבן געקענט אפשרייבן א גאנצע אשכול צווישן זיך...
איך בין צוריקגעבליבן מיט טויזנטער אשכולות, אבער איך געב נישט אויף... שטייטליך און צוביסלעך וועט מען אי"ה "ווייס מאכן די קרעטשמע"

אוועטאר
ידיד
שר שלשת אלפים
תגובות: 3816
זיך איינגעשריבען אום: מאנטאג יולי 16, 2012 6:37 pm

תגובהדורך ידיד » פרייטאג יולי 05, 2013 12:18 am

פאטאקי08 האט געשריבן:קרעמער שרייבט דארט אז די ערשטע פארום האט געהייסן היימישע שטותים
אויב אזוי איז די ניק קרעמער נישט געווען דער מיסד
קרעמער איז לכאורה געבוירן געווארן נאכן מופן
נישט אזוי?

סארי כ'פארשטיי נישט וואס דו פרעגסט, ער שרייבט דאך קלאר אז ער האט געגרינדעט די "היימישע שטותים" פארום

--
לכאורה האקט..

אוועטאר
לכאורה
שר עשרת אלפים
תגובות: 11701
זיך איינגעשריבען אום: דינסטאג אוקטובער 20, 2009 2:43 pm

תגובהדורך לכאורה » פרייטאג יולי 05, 2013 12:19 am

ידיד, פאטאקי08 איז גערעכט. היימישע שטותים איז געגרינדעט געווארן דורך "הוטקע", קרעמער'ס ערשטע ניק. אינטערסאנט אז ער שרייבט נישט דערוועגן אינעם אינטערוויו.
איך בין צוריקגעבליבן מיט טויזנטער אשכולות, אבער איך געב נישט אויף... שטייטליך און צוביסלעך וועט מען אי"ה "ווייס מאכן די קרעטשמע"

אוועטאר
ידיד
שר שלשת אלפים
תגובות: 3816
זיך איינגעשריבען אום: מאנטאג יולי 16, 2012 6:37 pm

תגובהדורך ידיד » פרייטאג יולי 05, 2013 12:22 am

אפשר וויל ער עס האלטן בסוד? ווער זאגט אז דו האסט עס געמעגט דא פארציילן..?

אוועטאר
לכאורה
שר עשרת אלפים
תגובות: 11701
זיך איינגעשריבען אום: דינסטאג אוקטובער 20, 2009 2:43 pm

תגובהדורך לכאורה » פרייטאג יולי 05, 2013 12:22 am

איך ווארט אויף א פסק פון אים אין אישית...

#כיטרע
איך בין צוריקגעבליבן מיט טויזנטער אשכולות, אבער איך געב נישט אויף... שטייטליך און צוביסלעך וועט מען אי"ה "ווייס מאכן די קרעטשמע"

אוועטאר
מאנ-יימער
שר עשרת אלפים
תגובות: 10552
זיך איינגעשריבען אום: מיטוואך דעצמבער 14, 2011 10:36 am
לאקאציע: אויפן וועג ארויף

תגובהדורך מאנ-יימער » פרייטאג יולי 05, 2013 12:23 am

הוטקע איז נאר די ניק, אין די אינטערוויא רופט ער זיך ביים עכטן נאמען "קרעמער"
ווער זאגט?... ער האט געזאגט איז וואס?... נו! האט ער געזאגט, ווער איז ער צו זאגן?

אוועטאר
לכאורה
שר עשרת אלפים
תגובות: 11701
זיך איינגעשריבען אום: דינסטאג אוקטובער 20, 2009 2:43 pm

תגובהדורך לכאורה » פרייטאג יולי 05, 2013 12:25 am

גראדע איז הוטקע מער א נאמען, עס איז די ענגלישע בוכשטאבן פונעם אידישן "יואלי".
#טשעקאיראוט
איך בין צוריקגעבליבן מיט טויזנטער אשכולות, אבער איך געב נישט אויף... שטייטליך און צוביסלעך וועט מען אי"ה "ווייס מאכן די קרעטשמע"

אוועטאר
leiby
שר שלשת אלפים
תגובות: 3905
זיך איינגעשריבען אום: זונטאג נובעמבער 16, 2008 11:08 pm
לאקאציע: צווישן אידן

תגובהדורך leiby » פרייטאג יולי 05, 2013 12:38 am

דאס איז די ערשטע מאל וואס ס'שטייט אין פאבליק אז האטקע איז איינס מיט קרעמער, רוף שנעל צוריק אלע אלטע קרעטשמעריסטן, זיי האבן זיך שטארק געמוטשעט דערויף.
שש מצות תמידיות: אהבת ה',יראת ה', יחוד ה', אמונה בה', שלילת ע"ז, ולא תתורו.

פאמיליעמירעלס
שר האלף
תגובות: 1162
זיך איינגעשריבען אום: דאנארשטאג אוגוסט 30, 2012 2:31 am

תגובהדורך פאמיליעמירעלס » פרייטאג יולי 05, 2013 12:41 am

leiby האט געשריבן:דאס איז די ערשטע מאל וואס ס'שטייט אין פאבליק אז האטקע איז איינס מיט קרעמער, רוף שנעל צוריק אלע אלטע קרעטשמעריסטן, זיי האבן זיך שטארק געמוטשעט דערויף.


נע, סיז שוין געשטאנען אסך מאל.

אוועטאר
leiby
שר שלשת אלפים
תגובות: 3905
זיך איינגעשריבען אום: זונטאג נובעמבער 16, 2008 11:08 pm
לאקאציע: צווישן אידן

תגובהדורך leiby » פרייטאג יולי 05, 2013 12:48 am

נאר חשדות.
שש מצות תמידיות: אהבת ה',יראת ה', יחוד ה', אמונה בה', שלילת ע"ז, ולא תתורו.

פאמיליעמירעלס
שר האלף
תגובות: 1162
זיך איינגעשריבען אום: דאנארשטאג אוגוסט 30, 2012 2:31 am

תגובהדורך פאמיליעמירעלס » פרייטאג יולי 05, 2013 12:51 am



צוריק צו “היימישע קרעטשמע”

ווער איז אונליין

באנוצערס וואס דרייען זיך דא: נישטא קיין איינגעשריבענע באנוצערס און 7 געסט